Qazaqstan musylmandary dinı basqarmasynyń Shymkent qalasyndaǵy ókildigi «Ulttyq sport fest» spartakıadasyn ótkizdi. Jarys shartyna sáıkes megapolıstiń bes aýdanynda ornalasqan meshit qyzmetkerleri bes komanda quryp jarysty. Sporttyq saıysqa jeti túrli oıyn kirdi. Atap aıtqanda, kir tasyn kóterý, asyq atý, láńgi tebý, arqan tartys, sadaq atý, qol kúres pen fýtbol.
Atalǵan sporttyq is-sharada Shymkent qalasynyń bas ımamy Baqdáýlet Nurmatuly sportpen shuǵyldaný paıǵambarymyz Muhammedtiń (s.ǵ.s) súnneti ekenin aıta kele, din men dástúrdi jalǵaǵan spartakıadaǵa demeýshilik kórsetken izgi jandarǵa jamaǵat atynan alǵysyn bildirdi.
Al dintanýshy, qalanyń naıb-ımamy Muhamedjan Estemirov toǵyzqumalaq, arqan tartys, asyq atý, láńgi tebý, shekem tas oıny, kir tasyn kóterý, kókpar, báıge, sadaq atý, qol kúres sporty erte zamannan kele jatqan halqymyzdyń ulttyq murasy ekenin, atalǵan sport túrin umyt qaldyrmaı, urpaqtan-urpaqqa jetkizip otyrý bárimiz úshin paryz sanaıtynyn aıtty.
Spartakıadaǵa ulttyq sport túrinen elimizge belgili saıypqyrandar Abylaı Maqsut, Maqsat Ábdikerimov pen Mıras Qarabaevtar tórelik jasady. Jarys qorytyndysynda I oryndy «Qarataý» komandasy alyp, syılyqqa jylqy maly tartyldy. II oryn «Ál-Farabı» tobynyń qanjyǵasynda ketti. Ol komandaǵa marapat retinde iri qara mal syıǵa berildi. III oryn ıelengen «Turan» quramasy qoshqardy mise tutty. Al yntalandyrý syılyǵyna ıe bolǵan «Abaı» men «Eńbekshi» komandalary semiz toqtymen marapattaldy. Aıta ketý kerek, bul komandalardyń bári de – shahardaǵy bes aýdannyń atynan saıysqa shyqqan toptar. Eń bastysy, din salasynyń qyzmetkerleri sporttyq is-shara arqyly kópshilikke, ásirese jastarǵa úlken úlgi-ónege kórsetti.
Jýyrda QMDB tóraǵasy, bas múftı Naýryzbaı qajy Taǵanulynyń bastamasymen dinı basqarmada «Din men dástúr» dep atalatyn jańa bólim ashylǵan bolatyn. Atalǵan bólim ıdeıasynyń nátıjesinde, sonymen birge dinı basqarma qolǵa alǵan «Izgi qoǵam» jobasy aıasynda osy «Ulttyq sport fest» spartakıadasy uıymdastyrylyp otyr. Bul salamatty ómir saltyn nasıhattaý ǵana emes, Astana qalasynda ótken Dúnıejúzilik kóshpeliler oıyndarynyń aımaqtaǵy kishigirim jalǵasy ispetti.
ShYMKENT