Batys Qazaqstan oblysynyń Tasqala aýdany ortalyǵynda 320 oryndyq dene shynyqtyrý-saýyqtyrý kesheni ashylyp, Keńes Odaǵynyń batyry Sadyq Jaqsyǵulovtyń týǵanyna 100 jyl tolýyna oraı qazaq kúresinen halyqaralyq týrnır ótti.
Jańa keshen aýyl turǵyndarynyń túrli sport túrlerimen aınalysýyna tolyq múmkindik beredi. Munda zamanaýı sporttyq jabdyqtar, jattyǵý alańdary, trenajerlik zal, medısınalyq kabınet bar, gımnastıka, kúres, basketbol, voleıbol, fýtbol alańdary jasaqtalǵan. Jáne bir qýanysh – «Tasqala aýdandyq sport klýby» memlekettik kommýnaldyq qazynalyq kásipornyna oblys ákimi Narıman Tóreǵalıulynyń atynan jańa mıkroavtobýstyń kilti usynyldy.
Keńes Odaǵynyń batyry Sadyq Jaqsyǵulovtyń qurmetine arnalǵan týrnır Tasqala óńirinde talaı jyldan beri dástúrli ótip keledi. Bıylǵy týrnırde Aqmola, Almaty, Abaı, Túrkistan, Jambyl, Qaraǵandy, Mańǵystaý, Aqtóbe, Atyraý, Batys Qazaqstan oblysy men Aqjaıyq, Báıterek, Bórli, Jańaqala, Jánibek, Qaztalov, Terekti, Shyńǵyrlaý, Syrym, Tasqala aýdandarynyń palýandary óner kórsetti. Jarystyń bas tóreshisi – qazaq kúresinen ulttyq dárejedegi tóreshi Damır Ramazanov boldy. Boz kilemde almatylyq Rýslan Ábdrazaqov, Ǵalymjan Qyryqbaı, abaılyq Saıat Shámshıev, mańǵystaýlyq Nurdáýlet Jarylǵapov, tarazdyq Aıdar Beskempir sekildi ataǵynan at úrketin palýandar beldesti. «О́giz palýan» saıysyna 22 palýan tirkelip, aqtyq synǵa tarazdyq Aıdar Beskempir men syrymdyq Nursultan Myrzahmetov shyqty. Asa tartysty beldesýden keıin jeńis tarazdyq palýanǵa berildi.
Asa aýyr salmaqtaǵy palýandar arasynda aqtyq aınalymǵa tórt palýan: qaztalovtyq Ernazar Hamzın, almatylyq Rýslan Ábdrazaqov, mańǵystaýlyq Nurdáýlet Jarylǵapov, atyraýlyq Suńǵat Zakarııaev shyqty. Bul tórteýi de «Qazaqstan barysy» respýblıkalyq týrnırine qatysyp júrgen palýandar. Fınaldyq básekede Nurdáýlet pen Ernazar kezdesti. Sóıtip, týrnırdiń bas júldesi – avtokólik Mańǵystaýǵa jol tartty.
Jarystyń jabylý saltanatynda aýdannyń atymtaı jomart azamattary sambodan álem chempıony Temirlan Kólbaı men jýyrda Tashkent qalasynda ótken eresekter arasynda IMMAF jekpe-jek sport túrinen álem birinshiliginiń kúmis júldegeri Qadyrbek Shynbaevqa at mingizdi. 90 kg deıingi salmaqta óner kórsetip, týrnırdiń jeńimpazy atanǵan tarazdyq Aıbar Beskempirge 1 mln teńge aqshalaı syılyq tabystaldy.
Batys Qazaqstan oblysy