Nazarbaev ýnıversıtetindegi Joǵary bilim berý mektebi ázirlegen «Dekandar mektebi» akademııalyq kóshbasshy baǵdarlamasy boıynsha elimizdegi 33 joǵary oqý ornynan kelgen 78 fakýltet dekany bilim alyp jatyr. Baǵdarlama aıasynda olar sarapshylarmen birge bilim berý uıymdaryn strategııalyq josparlaý jáne tıimdi basqarý máselelerin talqylaıdy. Sonymen qatar strategııalyq josparlardy ázirleý men júzege asyrýdy, qarjylyq jáne resýrstardy basqarý ádisin durys qoldanýdy úırenedi.
Dekandar aldynda baıandama jasaǵan Ǵylym jáne joǵary bilim mınıstri Saıasat Nurbek óz sózinde 34 sheteldik ýnıversıtet ókilin qamtyǵan halyqaralyq keńes qurylǵanyn jetkizdi.
«Biz qazir túbegeıli qaıta qurý kezeńine aıaq bastyq. Sondyqtan mınıstrlik óz aldyna úsh mindet qoıyp otyr: birinshisi – osy seriktestikter arqyly Qazaqstandy akademııalyq jáne ǵylymı ortalyq retinde qurý; ekinshisi – memlekettik ýnıversıtetterdi halyqaralyq zertteý ýnıversıtetterine aınaldyrý, úshinshi – tehnologııalar transferti úshin osy platformalardy paıdalaný», dedi ol.
Baǵdarlama sheńberinde NU sarapshylary bilimdegi jańa ózgeristerge qalaı beıimdelý, táýekelderdi basqarý jáne osy saladaǵy bıznes-úderisteri týraly oı-pikirlerin ortaǵa saldy. Sondaı-aq NU prezıdenti doktor Vakar Ahmad pen Joǵary bilim mektebiniń (GSE) dekany Aıda Saǵyntaeva basqarý tájirıbelerimen bólisti.
«Ýnıversıtetter kúrdeli máselelerdi sheship, synı turǵydan oılaıtyn adamdardan turady. Eger siz olardy basqarýǵa tyryssańyz, siz sátsizdikke ushyraısyz. О́ıtkeni bul aqyldy adamdar qatań nusqaýlardy oryndamaıdy. Meniń jumysym – talanttardy taýyp, olarǵa jaǵdaı jasaý. Myqty kóshbasshy azamattarǵa óz maqsatyna jetýge múmkindik beredi. Al meniń rólim – olarǵa bul úshin múmkindik týǵyzý», deıdi NU prezıdenti doktor Vakar Ahmad.
Oqý barysynda NU vıse-prezıdenti Asel Ývalıeva men Qoja Ahmet Iаsaýı atyndaǵy halyqaralyq qazaq-túrik ýnıversıtetiniń professory Moldııar Ergebekov seriktestik qurý jáne resýrstardy jumyldyrýdaǵy kommýnıkasııalyq strategııanyń mańyzyna arnalǵan sessııa ótkizdi. Oǵan qonaq retinde shaqyrylǵan sheteldik bilim berý sarapshysy Venera Baıjigit qatysýshylarǵa áleýmettik jelilerdegi jeke brendti qalaı qurýǵa bolatyny týraly sheberlik sabaǵyn uıymdastyrdy. Al Túrkııadaǵy Kodjaelı densaýlyq jáne tehnologııa ýnıversıtetiniń rektory Mýzaffer Elmas derekterge negizdelgen strategııalyq josparlaý úshin monıtorıng jáne baǵalaý júıeleri týraly tyń aqparat berdi.
Budan bólek, baǵdarlamada belgilengen «Dekandar kúninde» qatysýshylar atalǵan ýnıversıtettegi Joǵary bilim berý, Medısına, Injenerııa jáne sıfrlyq ǵylymdar sııaqty túrli ǵylymı mekteptiń jumysymen jaqyn tanysty.
Aıta keteıik, baǵdarlama iske qosylǵan 25 qyrkúıekten beri bes modýl ótken. Onyń 2-ýi Nazarbaev ýnıversıtetinde bolsa, 3-ýi Túrkistandaǵy Qoja Ahmet Iаsaýı ýnıversıtetinde ótkizilgen. Al 18-22 qarasha aralyǵynda Shanhaı pedagogıkalyq ýnıversıtetinde (SHNU) halyqaralyq bes kúndik modýl ótedi. Munda qatysýshylar joǵary bilimdi basqarýdyń halyqaralyq tájirıbesi men zertteýlerine baılanysty tájirıbe almasady.