Adam quqyqtary jónindegi ulttyq ortalyqtyń Túrkistan oblysyndaǵy ókildigine óńir turǵyndarynan bıylǵy on aıda 156 aryz kelip túsken. Aryzdanýshylardyń basym bóligi, naqtyraq aıtsaq 35-i – sotqa deıingi tergep-tekserý, onyń zańdylyǵyn qadaǵalaý máselelerimen júgingen.
Áleýmettik qamtamasyzdandyrý quqyǵy – 23, laýazymdyq ókilettikterin asyra paıdalaný máselelerimen 18 aryz túsken. Sottalǵandardyń quqyǵy, medısınalyq máselemen aryzdanǵandar da az emes. Mysaly, ókilge densaýlyq saqtaý salasynyń qyzmetine qatysty aryzdanǵan azamat emhana kepildengen medısınalyq qyzmet kórsetýden bas tartqanyn aıtqan. Iаǵnı zańmen belgilengen kepildi medısınalyq kómektiń kólemin tegin alý quqyǵy shektelgen. Atalǵan faktige qatysty «Áleýmettik medısınalyq saqtandyrý qory» KeAQ Túrkistan oblystyq fılıalyna usynym jiberilip, nátıjesinde zań buzǵany úshin medısınalyq uıymǵa ekonomıkalyq shara qoldanylypty.
Sondaı-aq ýákildiń Túrkistan oblysyndaǵy ókiline Reseıde turatyn Qazaqstan azamatynyń týysqany aryzdanǵan. Týysqany úıinde bolǵan órttiń kesirinen týý týraly kýáligin joǵaltqan. Sol sebepti jeke basyn anyqtaıtyn qujattardy rásimdeı almaı jatqanyn málim etken. Ýákildiń ókili ádilet departamentine jáne Túrkistan qalalyq AHAT bólimine týý týraly kýálikti qaıta rásimdeý úshin hat joldap, nátıjesinde atalǵan qujat aryz ıesine joldanǵan.
«Ýákil, onyń ókilderi óz ókilettikteri sheńberinde memlekettik organdarǵa jedel qabyldaýǵa kirý quqyǵyn paıdalanady. Memlekettik organdar, jergilikti memlekettik basqarý jáne ózin-ózi basqarý organdary, laýazymdy tulǵalar ýákilge, onyń ókilderine dereý járdem kórsetýge mindetti. Bıylǵy 10 aıda ókildikke kelip túsken, tirkelgen 156 aryzdyń 67-sine jazbasha túsiniktemeler berilse, 67 aryzdanýshynyń talaby, suraǵy qanaǵattandyryldy. Al 17-si quzyrly memlekettik organdarǵa joldandy, beseýi qaralyp jatyr. Aryzdardy qaraý barysynda 32 usynym jiberildi. Nátıjesinde, 10 laýazymdy tulǵa tártiptik jaýapkershilikke, bir azamat ákimshilik jaýapkershilikke tartyldy», deıdi Adam quqyqtary jónindegi ulttyq ortalyqtyń Túrkistan oblysy boıynsha ókili Natalıa Qojabekova.
О́kil 166 azamatty jeke qabyldap, onyń 126-sy boıynsha quqyqtyq túsindirmeler júrgizse, 40-nyń máselesi sheshimin tapqan. Sondaı-aq memlekettik organdar ókilderimen birge azamattardy birlesken 33 qabyldaý ótkizilgen.
«Ýákildiń quzyretteriniń mańyzdy salasy – azaptaýdyń, qatygez qarym-qatynastyń aldyn alýda Ulttyq aldyn alý tetiginiń (UAT) jumysyn úılestirý. Osylaısha, UAT qoǵam ókilderinen quralǵan sarapshylardan turatyn júıe bolsa, ýákil memleket atynan osy mehanızmmen ózara yqpaldastyqta bolyp, onyń jumysyn úılestirip otyrady. Búginde óńirde 7 belsendi azamattan, sarapshydan quralǵan UAT toby bar, osy toppen tyǵyz baılanysta jumys istep jatyrmyz», deıdi Natalıa Suńǵatqyzy.
Qazir ókil – 6 konsýltatıvtik-keńesshi jáne baqylaý organdarynda múshe. Bıylǵy 7 aıda konsýltatıvtik-keńesshi jáne baqylaý organdarynyń 17 otyrysyna qatysyp, adamdardyń quqy men bostandyǵyn qorǵaýdy jetildirý maqsatynda 8 usynym berilipti. Sondaı-aq bıylǵy on aıda ókil 79 mandatty mekemelerge barǵan. Nátıjesinde, quzyrly organdarǵa 54 usynym joldanǵan. О́kildiń joldaǵan usynymdary nátıjesinde 14 laýazymdy tulǵa tártiptik jaýapkershilikke, 10 tulǵa ákimshilik jaýapkershilikke tartyldy.
Túrkistan oblysy