Elordada ótken IX respýblıkalyq «WorldSkills Kazakhstan-2024» chempıonaty óz máresine jetti.
Chempıonatqa óńirlik deńgeıde úzdik atanǵan 555 stýdent qatysyp, 30 quzyrettilik boıynsha baq synady. Baıqaýda stýdentter aqparattyq, ınjenerlik, óndiristik tehnologııalar, kólik, áleýmettik qyzmetter, dızaın jáne basqa da mańyzdy salalar boıynsha óz bilimderi men daǵdylaryn kórsetti. Bul chempıonattyń basty maqsaty – jumysshy mamandyqtarynyń bedelin arttyryp, eńbek naryǵyna qajetti jas mamandardy jumysqa ornalastyrýǵa yqpal etý.
Chempıonat aıasynda qatysýshylarmen kezdesken Premer-mınıstr Oljas Bektenov jastardyń alǵan bilimderi men daǵdylarynyń suranysqa ıe ekenin atap ótip, olardyń elimiz úshin mańyzdy ekenin aıtty. «Prezıdent jarııalaǵan jumysshy mamandyqtar jyly tehnıkalyq jáne kásiptik bilim berýdiń búkil elimiz úshin erekshe mańyzyn kórsetedi. Úkimet aldyna ekonomıka qurylymyn jańǵyrtý boıynsha órshil mindetter qoıyldy. Ol úshin bizge energetıka, qurylysshy, aýyl sharýashylyǵy, kólik jáne sý salasynda bilikti otandyq mamandar qajet. Bul rette sıfrlyq transformasııa men tehnologııalyq progrestiń syn-qaterlerine daıyn bolý mańyzdy. Sondyqtan bizdiń ortaq mindetimiz – qoǵamnyń barlyq resýrsyn biriktirý. Bul baǵytta biz jastarymyzǵa jáne osyndaı is-sharalarǵa jan-jaqty qoldaý kórsetetin bolamyz», dedi Premer-mınıstr. Sondaı-aq Úkimet basshysy stýdentterdiń kásibı daǵdylaryn kórsetýine múmkindik bergen mamandandyrylǵan aımaqtar qurǵan kompanııalarǵa alǵysyn bildirdi.
Oqý-aǵartý mınıstri Ǵanı Beısembaev «WorldSkills Kazakhstan» chempıonatyn tek kásibı baıqaý ǵana emes, jumysshy mamandyqtarynyń bedelin arttyryp, ekonomıkanyń turaqty damýyna yqpal etetin mańyzdy alań dep baǵalady. «WorldSkills» qozǵalysyn damytý arqyly biz halyqaralyq arenadaǵy pozısııamyzdy nyǵaıttyq. «WorldSkills» tek bedeldi baıqaý ǵana emes, sonymen birge jumysshy mamandyqtarynyń mártebesin arttyrýǵa jáne kásibı eńbektiń mańyzyn dáripteýge baǵyttalǵan mańyzdy alań. Bul qozǵalys elimizdiń turaqty ekonomıkalyq ósýi men tehnologııalyq progreske qol jetkizýi úshin qajetti kadrlyq áleýetti qalyptastyrýda aıryqsha ról atqarady. Salalyq mınıstrliktermen yntymaqtastyq arqyly biz eńbek naryǵynda suranysqa ıe mamandardy daıarlap, olardy jumyspen qamtýǵa jaǵdaı jasaımyz», dedi Oqý-aǵartý mınıstri.
«Talap» KeAQ prezıdenti Sanjar Tátibekovtiń aıtýynsha, stýdentter osy alańda óz qabiletterin kórsetý arqyly elimizdiń adamı kapıtalyn arttyrýǵa úles qosady. «Bizdiń alań óz daǵdylarymyzdy kórsete otyryp, Qazaqstannyń adamı kapıtalyn arttyrýǵa qatysýǵa daıyn ekenimizdi bildiredi. Biz TjKB júıesine «WorldSkills International» standarttaryn engizemiz, tıisti oqytý arqyly pedagogterdiń biliktiligin arttyramyz. Sondaı-aq standarttar demonstrasııalyq emtıhan ótkizý arqyly bilimdi qorytyndy baqylaý kezinde qoldanylady», dedi ol.
Chempıonat qorytyndysy boıynsha 108 jeńimpaz anyqtaldy. Jeńimpazdar 32 altyn, 37 kúmis jáne 39 qola medal ıelendi. 155 qatysýshy «Úzdik medalonǵa» ıe boldy. Komandalyq esepte Astana qalasy men Abaı oblysynyń qurama komandasy kósh bastady, ekinshi oryndy – Almaty qalasy jáne úshinshi orynǵa Qaraǵandy oblysy ıe boldy.
Aıta keteıik, respýblıkalyq kezeńniń jeńimpazdary kelesi jyldyń 9-13 qyrkúıegi aralyǵynda Danııada ótetin «EuroSkills-2025» halyqaralyq chempıonatynda elimizdiń namysyn qorǵaıdy.