Keshe Premer-Mınıstrdiń birinshi orynbasary Baqytjan Saǵyntaev 2015-2019 jyldarǵa arnalǵan «Nurly Jol» ınfraqurylymdyq damý memlekettik baǵdarlamasyn júzege asyrý barysyna arnalǵan keńes ótkizdi, dep habarlady Premer-Mınıstrdiń baspasóz qyzmeti.
Baǵdarlama sheńberinde eldiń ishki rynogyn, tranzıttik jáne eksporttyq áleýetti ulǵaıtýǵa, sondaı-aq, ınfraqurylymdy damytýǵa baǵyttalǵan basymdyqty jobalar júzege asyrylatyn bolady. Qazirgi ýaqytta «Batys Eýropa – Batys Qytaı» avtodáliziniń, Astana – Almaty, Astana – О́skemen, Qyzylorda – Jezqazǵan – Qaraǵandy, Astana – Aqtóbe – Atyraý – Aqtaý, Almaty – О́skemen trassalarynyń ýchaskelerinde qurylys jumystary júrýde. Temirjol salasy men kólik logıstıkasy jobalary boıynsha da jumystar júzege asyrylýda. Atap aıtqanda, Almaty-1 – Shý temirjol ýchaskesinde ekinshi jol qurylysy úshin qazirdiń ózinde topo-geodezııalyq jáne ınjenerlik-geologııalyq zertteýler júrgizilýde.
Borjaqty – Ersaı jelisiniń qurylysy júrýde, Quryq portynda paromdy ótkel salý jobasy boıynsha memlekettik saraptama qorytyndysy alyndy, geodezııalyq jáne ınjenerlik-geologııalyq zertteýler júrgizilýde. Astana qalasy áýejaıynyń ushý-qoný jolaǵy men termınalyn qaıta jańǵyrtý boıynsha jumystar atqarylýda. Qazaqstanda AEA men ındýstrııalyq parkterdi damytýǵa, turǵyn úı, mektepter men balabaqshalar salýǵa, elimizge keletin jáne syrtqa shyǵatyn týrızmdi odan ári damytý úshin ınfraqurylymdar jasaýǵa, AО́K sýbektilerin, otandyq avtomobılder, tikushaqtar, jolaýshylar vagondaryn jasaýshylardy qoldaýǵa baǵyttalǵan qarjylar ıgerilýde.
Keńes qorytyndysy boıynsha Baqytjan Saǵyntaev mınıstrlikterge, oblystar, Astana jáne Almaty qalalary ákimderine qarqyndy báseńsitpeı, 2015-2019 jyldarǵa arnalǵan «Nurly Jol» ınfraqurylymdyq damý memlekettik baǵdarlamasyn júzege asyrý jónindegi is-sharalar josparynyń ýaqtyly júzege asýyn qamtamasyz etýdi, sondaı-aq, vedomstvoaralyq is-qımyldy jáne qarjynyń tıimdi ıgerilýine baqylaý jasaýdy kúsheıtýdi tapsyrdy.