Almatydaǵy Almaty creative ortalyǵynda Mádenıet jáne aqparat vıse-mınıstri Evgenıı Kochetovtyń kreatorlarmen kezdesýi ótti. Oǵan rejısserler men prodıýserler, sýretshiler qatysty.
Kezdesýde kreatıvti ındýstrııa salasyndaǵy ózekti máseleler talqylandy. Onyń ishinde zańnamalyq bastamalar, ınfraqurylymdy damytý, qazaqstandyq kreatıvti ónimder ımporty sóz etildi.
«Shyǵarmashylyq mamandardy qoldaý – bolashaqqa jasalǵan ınvestısııa. Kreatıvti ındýstrııa biregeı ónim jasap, mádenı áleýetti nyǵaıta otyryp, jańa ekonomıkany qalyptastyrady», dedi Almaty creative dırektorynyń mindetin ýaqytsha atqarýshy Baqyt Elýbaeva.
Sondaı-aq kezdesý aıasynda kreatorlarǵa kreatıvti ındýstrııalardy damytýǵa qosqan úlesi úshin QR Mádenıet jáne aqparat mınıstrliginiń «Qurmet gramotasy» tabystaldy.
«Kreatıvti ekonomıka salasyndaǵy zertteýler Qazaqstandaǵy osy sektordy damytý úshin óte mańyzdy. 7 jyldan astam ýaqyt boıy áriptesterimmen birge sapaly qoldanbaly zertteýler jasaýǵa tyrysyp kelemiz. Bul gramota bizdiń jumysymyzdyń mınıstrlik tarapynan baǵalanǵanyn rastaıdy jáne bul men úshin óte mańyzdy», dedi Narhoz Ýnıversıtetiniń kreatıvti ekonomıka jobalarynyń jetekshisi Dana Shaıahmet.
Aıta keteıik, búginde Almaty - Qazaqstandaǵy kreatıvti ındýstrııalardyń ortalyǵy. Munda eldegi kreatıvti ındýstrııa sýbektileriniń úshten biri tirkelgen.