Semeıde surapyl daýyl boldy. 14 maýsym kúni saǵat 18.30-da oryn alǵan tabıǵattyń tosyn oqıǵasy shahar turǵyndaryn biraz ábigerge saldy. Sekýndyna 20-35 metr jyldamdyqpen soqqan adýyn jel birqatar nysandardyń shatyryn julyp ketip, kóshe jıegindegi tal-terekterdi qulatty.
Qalanyń birqatar bóliginde jaryq óshti. Stansalardaǵy elektr qýatynyń bolmaýynan 40 myńǵa jýyq semeılik turǵyn sýsyz qaldy. Tótenshe oqıǵadan soń Semeı qalasynyń jedel járdem qyzmetine 10 zardap shekken turǵyn habarlasyp, onyń 8-i túrli dene jaraqattarymen aýrýhanaǵa jatqyzyldy. Olardyń arasynda ústine synǵan aǵash qulaǵan áıel jáne jel julyp ketken shatyrdyń astynda qalyp, jaraqattanǵan eki er adam bar. Daýyldan qaladaǵy 11 mektep, 12 kópqabatty úı, 3 áleýmettik-mádenı nysan jáne 30 jeke turǵyn úı men joǵary kerneýli elektr jelisi, 28 elektr qýatyn berý jelileri, bılbordtar, 28 avtokólik zardap shekti. Sondaı-aq, 10 kóshe men 4 jol ótkelin sý basty. Eń bastysy, adam shyǵyny oryn alǵan joq.
Qazirgi kezde oblys ákiminiń orynbasary Dımıtrıı Garıkovtyń tóraǵalyǵymen tótenshe jaǵdaı zardaptaryn joıý jónindegi komıssııa jumys isteýde. О́ńir basshysy Danıal Ahmetovtiń tapsyrmasy boıynsha qalada qalpyna keltirý jumystary túni boıy júrgizildi.
Oblystyq tótenshe jaǵdaılar departamentiniń málimetine qaraǵanda, dereý qolǵa alynǵan jumystar nátıjesinde elektr jaryǵynsyz qalǵan 57184 abonenttiń basym bóligi elektr qýatyna qaıta qosyldy. Apat saldaryn joıýǵa jergilikti atqarýshy organdar men jedel jumyldyrý qurylymdary tartyldy. Atap aıtqanda, daýyl zardaptaryn joıý maqsatynda 50 tehnıka men 200-ge jýyq maman jumys isteýde.
Sondaı-aq, avtokólik joldary qulaǵan aǵashtardan tazartylyp, jol qozǵalysy qalpyna keltirildi. Baǵdarshamdar istemeı turǵan kóshe qıylystaryndaǵy kólik qozǵalysyn retteýge jol saqshylary tartyldy.
Dýman ANASh,
«Egemen Qazaqstan».
SEMEI.