Qostanaıdaǵy Ybyraı Altynsarın memorıaldyq mýzeıinde Arqalyq pedagogıka ınstıtýty murajaıynyń kóshpeli kórmesi ashyldy. Arqalyqtan kelgen qundy jádigerlerdiń ishinde 1864 jyly Torǵaıda Ybyraı ashqan tuńǵysh mekteptiń qońyraýy da bar.
160 jyldyq tarıhy bar kóne qońyraý búginde Ybyraı Altynsarın atyndaǵy Arqalyq pedagogıka ınstıtýtynyń murajaıynda saqtaýly tur. Kóshpeli kórme ınstıtýt ǵalymdarynyń zertteý jumystarynyń nátıjesinde tabylǵan ózge de baǵa jetpes dúnıelerdi, mysaly, aǵartýshynyń tabaǵyn, qymyz ishken tostaǵanyn, Ybyraıdyń balasy Abdolla men nemeresi Naǵımaǵa tıesili zattardy, qundy sýretter men derekti muraǵattyq qujattardy jurtshylyq nazaryna usynyp otyr.
«Elimizde áıgili aǵartýshyǵa arnap ashylǵan tuńǵysh mýzeı osy Arqalyqtaǵy Ybyraı Altynsarın atyndaǵy memlekettik pedagogıkalyq ınstıtýtynda bolatyn. Bul – elimizdegi aǵartý isiniń, bilim berý úderisiniń damý tarıhynan syr shertetin alǵashqy murajaıdyń biri. 1974 jyldan beri jumys istep kele jatqan murajaıdyń ashylýyna ınstıtýttyń tuńǵysh rektory Myrzaǵalı Tólegenov pen murajaıdyń alǵashqy dırektory Áset Lamashev kóp eńbek sińirdi. Ybyraı Altynsarın murasyn zerttep, zerdelep, atalǵan mýzeıdi uıymdastyrýda, ásirese, ǵalym Áset Lamashev kóp ter tókti. Ol kisi 1,5 myńnan astam jazba qujattardy, qomaqty eksponattar qoryn jınap, elge tanytty. Alǵash eki bólmeden ǵana turǵan ınstıtýt ishindegi shaǵyn murajaıdy respýblıka deńgeıindegi memorıaldyq mýzeı mártebesine deıin jetkizip ketti. Sondyqtan bul mýzeıdiń ulttyq rýhanııat tarıhyndaǵy orny qashanda erekshe. Kórmeni uıymdastyrýǵa qoldaý kórsetip, Qostanaı jurtshylyǵynyń, elimizdiń túkpir-túkpirinen kelip osynda bilim alyp jatqan stýdent jastardyń túpnusqa qundy jádigerlermen tanysýyna múmkindik jasaǵan Arqalyq ınstıtýtynyń rektory Erjan Ámirbekulyna alǵysymyz sheksiz», deıdi mýzeı dırektorynyń orynbasary Saltanat О́telbaeva.
Arqalyqtan jetken kóshpeli kórme qarasha aıynyń sońyna deıin jumys isteıdi.
Qostanaı oblysy