Qordaı aýdanyndaǵy shekara qyzmetine áskerge shaqyrylǵan sarbazdardyń saltanatty túrde ant qabyldaý rásimi uıymdastyryldy. Kúzgi shaqyrylym aıasynda Otan aldyndaǵy boryshyn óteýge kelgen sarbazdardyń júzinen jaýapkershilik tabyn aıqyn ańǵardyq.
Sarbazdar úshin asa mańyzdy is-sharaǵa olardyń týystary men dostary, áskerı bólim komandırleri qatysty. Jas sarbazdardyń ant qabyldaý rásimine elimizdiń ár qıyrynan arnaıy kelgen ata-analar da qobaljyp júr. Olar úshin balasynyń áskerı boryshyn abyroımen ótegeni mańyzdy.
Kezekti shaqyrylym sarbazdary el shekarasynyń kúzetin qamtamasyz etetin Qordaı shekarasy basqarmasynyń qataryn tolyqtyrdy. Elimizdiń ońtústiginde ornalasqan bul aımaq shekara qyzmetin qamtamasyz etýde aıryqsha mańyzǵa ıe ekeni belgili. Ásker qataryna qabyldanǵandardyń moınyna zor mindet pen jaýapkershilik júgi artylǵan. Ant berý rásimi osy mindettiń rámizdik bastaýy desek te bolatyn sekildi. Bul kúni sarbazdar Otan aldyndaǵy jaýapkershiligin tereń sezinip, táýelsizdik pen beıbitshilikti, tynyshtyqty saqtaý jolyndaǵy qyzmetke shyn peıilmen daıyn ekenin jetkizdi.
Janarynda ot oınaǵan jas jaýyngerler ant qabyldaǵannan keıin birden áskerı daıarlyq baǵdarlamasyna qosyldy. Olar áskerı bólimde taktıkalyq jáne fızıkalyq daıyndyqtan ótip, shekara kúzetý isiniń qyr-syryn meńgerýge kirisedi.
«Áskerı ómirdiń árbir sáti shydamdylyq pen shyńdalýdy talap etetini málim. Biz sarbaz retinde múmkindiginshe shekara qorǵaý isine qajetti daǵdylardy meńgeremiz. Árqashan qyraǵy bolýǵa mashyqtanamyz. Mindetimiz – el tynyshtyǵy men táýelsizdigin qorǵaý. Sondyqtan da Otan aldyndaǵy qyzmetimizdi árdaıym adal atqarýǵa daıynbyz. Eń bastysy – abyroı», deıdi olar.
Qyrǵyz Respýblıkasymen shekaralas ornalasqan Qordaı aýdanynda ótken ant qabyldaý rásimine jalpy sany 321 sarbaz qatysty. Kúzgi shaqyrylym aıasynda Qazaqstannyń ulttyq qaýipsizdigin qamtamasyz etý jolynda ózderiniń alǵashqy qadamyn jasaǵan olardyń júzinen shattyq lebi esip turdy.
Ant qabyldaý rásimine Ulttyq qaýipsizdik komıtetiniń shekara qyzmeti Jambyl oblysy boıynsha departamentiniń basshysy, polkovnık Ǵanı Bekmyrzaev arnaıy qatysyp, jas sarbazdarǵa sáttilik tiledi. Ol óz sózinde ásker qataryna qosylǵan jaýyngerlerdiń elimizdiń shekaralyq qaýipsizdigin qamtamasyz etýdegi mańyzdy rólin atap ótip, sarbazdardyń Otan aldyndaǵy boryshyn abyroımen atqarýyna tilektes ekenin jetkizdi.
Jambyl oblysy,
Qordaı aýdany