Almaty qalasy ákimdiginde Premer-Mınıstrdiń birinshi orynbasary Baqytjan Saǵyntaevtyń qatysýymen «Zańdy tulǵalar jáne jyljymaıtyn múlik quqyqtaryn tirkeý rásimderiniń qysqartylýy» degen taqyrypta dóńgelek ústel otyrysy bolyp ótti.
Bıylǵy jyldyń 1 qańtarynan bastap óz kúshine engen «Qazaqstan Respýblıkasynda kásipkerlik qyzmetke qolaıly jaǵdaı týdyrý maqsatynda Qazaqstan Respýblıkasynyń keıbir zań aktilerine ózgertýler men tolyqtyrýlar engizý týraly» Zańy aıasynda elimizdegi kásipkerlik qyzmettiń jekelegen salalaryna qatysty birqatar tıimdi ózgerister qabyldanǵan. Qala ákimdiginde ótken dóńgelek ústeldi otandyq kásipkerlerdiń zańdy máselelerin ońtaıly sheshýge baǵyttalǵan zańnyń jekelegen baptary men ońtaıly tarmaqtary jóninde jan-jaqty talqylaý bolyp, túrli memlekettik qyzmet pen bıznestik uıymdardyń ókilderi óz pikirleri men usynystaryn ortaǵa saldy.
– Biz otandyq kásipkerlerdiń qyzmetin edáýir jaqsartý maqsatynda memleket tarapynan jasalǵan qoldaýdy talqylaý jáne túsinik berý sharasyn Almaty qalasynda ótkizýdi kezdeısoq tańdaǵan joqpyz. О́ıtkeni, bul qalada kásipkerliktiń eń joǵary kórsetkishi men qarjylyq aınalymnyń turaqty bıik mejesi qalyptasqan. Memleket IJО́-siniń 20 paıyzyn qurap otyrǵan Almaty elimizdiń bıznes ortalyǵy retinde shetelderge de keńinen tanys. Memleket basshysy Nursultan Nazarbaevtyń tapsyrmasymen byltyrǵy jyldyń sońynda qabyldanǵan otandyq kásipkerlikti qoldaý týraly zań Parlament qabyrǵasynda jan-jaqty qyzý talqymen qabyldanǵanyn bilesizder. Álemde damyǵan 30 eldiń qataryna qosylý jolynda biz otandyq kásipkerlikke qatysty zań aktilerine kóptegen jeńildikterdi engizgen edik. Búgin sony kásipkerlerimiz ben túrli bıznes ókilderine tanystyrý sharasyna kelip otyrmyz, – dedi Baqytjan Saǵyntaev kirispe sózinde.
Alqaly jıynda qala basshysy Ahmetjan Esimov ótken jylda el qazanyna qosqan qala úlesiniń kórsetkishterimen tanystyra kelip, qala aýmaǵyndaǵy ekonomıkalyq salalardyń jaı-kúıin, qarjy sektoryndaǵy ózgerister men álemdik ekonomıkalyq daǵdarysqa baılanysty oryn alǵan shekteýler jóninde, halyqty jumyspen qamtýdyń múmkinshilikteri jaıynda aıtyp ótti.
– Almaty qalasynda kásipkerlik odaqtardyń úlken toby shoǵyrlanǵandyqtan jáne halyqty jumyspen qamtý, memleket qazanyna salyq túrleri boıynsha eselep úles qosý jóninde elimizdiń jalpy kórsetkishiniń tórtten birin qurap otyrǵany aıan.
Munyń barlyǵy qala ákimdiginiń jekelegen banktermen jáne bıznespen ózara tyǵyz qatynas ornatyp, jan-jaqty memorandýmdar qabyldaǵanynyń nátıjesi. Byltyrǵy kórsetkish boıynsha shaǵyn jáne orta kásipkerlikti nesıelendirýde, jalpy qarjy salasynda kóptegen jaqsy nátıjelerge qol jetkizildi. Qazirgi álemdik ekonomıkadaǵy daǵdarys jaǵdaıyna baılanysty qalanyń strategııalyq baǵdarlamasyn qabyldap, aldaǵy ýaqytta buǵan deıingi qol jetkizgen jetistikterimizdiń deńgeıin bıik dárejede ustap turýǵa sheshim qabyldadyq, – dep atap ótti qala basshysy.
Dóńgelek ústel barysynda shaǵyn jáne orta kásipkerlik uıymdar men bıznes toptardyń ókilderine bıylǵy jyldyń 1 qańtarynan bastap kúshine engen zań aktisi boıynsha «Elektrondy úkimet» veb-portaly arqyly orta jáne shaǵyn kásipkerlikti tirkeý merzimi, orta jáne shaǵyn kásip ıelerine memlekettik tirkeý barysynda zańdy tulǵa retinde salynatyn alymnyń qysqartylǵany, kásipkerlerdiń jarǵy kapıtalynyń mólsherlemesi, zańdy tulǵalardy tirkeýde kásipkerlik sýbektilerge habarlama jasaý, tirkeý kezinde jarǵyny talap etý mindettemesi, tirkeý merzimderi jáne notarıaldyq kýálandyrý sharasynyń alynyp tastalýy, «Elektrondy úkimet» veb-portaly arqyly zańdy tulǵa statýsy anyqtamasyn alý joldary, sonymen qatar jyljymaıtyn múlikke quqyqtardy memlekettik tirkeý týraly zańnyń 21-babyna sáıkes qujattardy qabyldaý normasynyń jańartylǵan nusqasy túsindirildi. Ulttyq ekonomıka mınıstrligi, Energetıka mınıstrligi, Ádilet mınıstrligi jáne Qarjy mınıstrliginiń, sondaı-aq «Atameken» ulttyq kásipkerlik palatasynyń, Ulttyq banktiń ókilderi shaǵyn jáne orta kásip ıelerine atalmysh zańǵa engizilgen tolyqtyrýlar men jańalyqtardy tanystyryp, qujattandyrýdyń jańa úlgisi týraly túsinikteme berdi.
Qanat ESKENDIR,
«Egemen Qazaqstan».
ALMATY.