Senat spıkeri Máýlen Áshimbaevtyń tóraǵalyǵymen palata bıýrosy ótip, onda Senat otyrysynyń kún tártibin belgilendi. Sondaı-aq palatanyń is-sharalar josparyn iske asyrý aıasyndaǵy mindetter pysyqtaldy.
Otyrys barysynda senatorlar atalǵan josparǵa sáıkes osy aptada ótetin is-sharalarǵa toqtaldy. Atap aıtqanda, áskerı bilim jáne ǵylym, onyń ishinde túlekterdi jumysqa ornalastyrý, azamattyq avıasııany damytý, «áleýmettik ámııan» mehanızmin engizý jáne Memleket basshysynyń tapsyrmalaryn iske asyrý aıasynda áleýmettik az qamtylǵan sanattaǵy azamattardy qoldaý júıesin jetildirý máselelerine arnalǵan is-sharalar ótkiziledi.
Bekitilgen kún tártibine sáıkes aldaǵy beısenbide Senat depýtattary «Eýrazııalyq ekonomıkalyq odaq sheńberinde aýyl sharýashylyǵy ónimine arnalǵan qoımalyq kýálikterdi shyǵarý (berý), olardyń aınalysy jáne ótelý qaǵıdalary týraly kelisimdi ratıfıkasııalaý týraly» zańdy qaraıdy. Kelisim Eýrazııalyq ekonomıkalyq odaq sheńberinde aýyl sharýashylyǵy jáne aýyl sharýashylyǵy ónimderiniń ózara saýdasy salasyndaǵy yntymaqtastyqty damytýǵa arnalǵan. Sondaı-aq agrarlyq salanyń tabysyn arttyrýǵa jáne aýyl sharýashylyǵy taýarlarynyń elektrondyq saýdasyn damytýǵa múmkindik beredi.
Sonymen qatar bıýroda buǵan deıin Parlament Májilisinde qabyldanǵan zańdar jumys úshin Senattyń turaqty komıtetterine bólinip berildi.