Shyn tulǵa – qoǵam tárbıeshisi, el tutqasy. Adamshylyq paryzy úshin qyzmet qylǵan mundaı ult perzentteri qashanda el jadynda. Solardyń biri – abaıtanýshy ǵalym, fılologııa ǵylymdarynyń kandıdaty, dosent, uzaq jyldar Astana qalasynyń qylmystyq ister jónindegi mamandandyrylǵan aýdanaralyq sotynyń sýdıasy bolyp eńbek etken Qydyrbek Qorǵanbekuly.
Ázirbaıjan Mámbetov atyndaǵy memlekettik drama jáne komedııa teatrynda abaıtanýshy ǵalym, fılologııa ǵylymdarynyń kandıdaty, dosent Qydyrbek Qorǵanbekulyna arnalǵan «Qaldyrǵanym» atty eske alý keshi ótti. Tárbıe tunyǵyna sýarylǵan keshte rýhanııat haqyndaǵy oı-tolǵamdar, qoǵamdaǵy ákeniń orny men otbasy róli, belgili ǵalym týraly pikirler aıtyldy. Jıynda kórnekti aqyn, dramatýrg, qoǵam qaıratkeri Nurlan Orazalın kelgen jurtqa alǵys aıtyp, jyly lebizin bildirdi.
– Qydyrbek Qorǵanbekuly áýeli ádebıetti tańdady, aqyndyqty ıgerdi, aıtysqa túsip, mektep jasynan tilge, ádebıetke sergek qaraıtyn namysshyl oqýshylardyń biri boldy. О́se kele, «Allanyń ózi de ras, sózi de ras» degen Abaıdyń adamtaný, dintaný keńistigine boılap, ıslamnyń qudiretin, adamzat tarıhyndaǵy orny jónindegi dáıekti pikirlerin jazyp júrip, ony ǵylymı taqyrypqa aınaldyryp, dıssertasııa qorǵap shyqty. Abaıdyń, adamzattyń jan dúnıesin ǵalamdyq jaratylystaǵy tuǵyryn ashýda Abaıdyń qarasózderi men Qurandy, hakim poezııasy men paıǵambarymyzdyń hadısterin shendestire otyryp zerttep óziniń abaıtaný álemin jasady,– dedi Nurlan Myrqasymuly.
Sonymen qatar aqyn, «Túrkistan» gazetiniń bas redaktory Baýyrjan Babajanuly stýdenttik shaqtan tanyǵan qalamger týraly oıymen bólisti.
– Qydyrbekpen QazMÝ-dyń fılologııa fakýltetinde bir topta oqydyq. Toptyń starostasy edi. Únemi jymıyp júretin uzyn boıly, kórkem minezdi sary jigit kez kelgen adammen tez til tabysatyn. Jıyn-toılarda Úkili Ybyraıdyń «Qaldyrǵanyn» naqyshyna keltirip oryndaýshy edi. Maǵan áli kúnge deıin «Qaldyrǵandy» dál ol sekildi eshkim aıta almaıtyn sekildi kórinedi, – dedi aqyn.
Keshte Qydyrbek Qorǵanbekulynyń ómir joly týraly derekti fılm kórsetilip, kelgen kópshilik qaýym ónegeli ǵumyr ıesin tereńirek tanı tústi.