ASTANA. 31 qańtar. Tennısten Avstralııa ashyq birinshiliginiń qyzdar arasyndaǵy básekesinde AQSh tennısshisi Serena Ýılıams jeńiske jetti. Ol fınalda reseılik Marııa Sharapovadan 6:3, 7:6 (7:5) esebimen basym tústi. Bul týraly egemen.kz habarlady.
Dopty oıynǵa alǵash bolyp Marııa qosty. Bastapqy soqqylaryn jaqsy oryndaǵanymen, reseılik tennısshi bul geımde upaısyz qaldy. Qarsylasynyń dobyn óz paıdasyna sheshe bilgen Serena ekinshi geımde de Sharapovaǵa upaı bermedi. Nátıjesinde, alǵashqy sette AQSh tennısshisi 6:3 esebimen jeńiske jetti.
Kelesi kezeń Serenanyń aıqyn basymdyǵymen bastaldy. Qatarynan úsh márte eıs jasaǵan ol ekinshi settiń alǵashqy geıminde ońaı jeńdi. Desek te, Marııa set barysynda laıyqty qarsylyq kórsete bildi. Tipti, ekinshi geımde ol da úsh ret qatarynan eıs jasap, Serenanyń joıqyn soqqylaryna jaýap bergendeı boldy. Sondaı-aq, eki márte qarsylasynyń dobynan upaı alý múmkindigine ıe bolǵanymen, Ýılıams breık jasaýǵa Sharapovaǵa múmkindik bermedi. Ekinshi sette ár tennısshi óz dobynan upaı alyp, esep 6:6-ǵa jetti. Sheshýshi set bolmasa, mundaı sátte jeńimpaz taı-breık arqyly anyqtalatyny belgili. Al bul synda amerıkalyqtyń sheberligi basym boldy. Eki setke sozylǵan bul kezdesýde amerıkalyq 18 eıs jasasa, Marııa sondaı 5 joıqyn soqqymen jaýap qaıtar bilgen.
Osylaısha, Marııa Sharapova Serena Ýılıamsqa qatarynan 17-ret ese jiberýge májbúr boldy. Bul qos tennısshiniń ekeýara 19-oıyny. Alǵashqy ekeýinde Marııa jeńiske jetip, eldiń nazaryna ilikken bolatyn. Sebebi, ol sonaý 2004 jyly bolǵan oqıǵa. Al ol kezde Serenanyń ataǵy dúrildep tursa, Marııa alamanǵa endi qosylǵan 17-degi qyz edi. Desek te, Marııa sol 11 jyl burynǵy jeńisten keıin Serenanyń osal tusyn taba almaı keledi. «Úlken dýlyǵa» týrnırleriniń fınalynda 4 ret kezdesip, sonyń bireýinde Marııa jeńiske jetti. Jalpy, ekeýiniń WTA týrnırleriniń sheshýshi tartysynda 8 márte joldary túıisken eken. Sonyń ekeýi Marııanyń alǵashqy eki jeńisi bolsa, qalǵany Serenanyń paıdasyna sheshilgen. 2012 jylǵy London Olımpıadasynyń fınalynda da jankúıerler qos myqtynyń tartysyna kýá boldy. Ol joly Olımpıadanyń altyn medalin AQSh tennısshisi moınyna taqqany esimizde.
Serena úshin bul Avstralııa ashyq birinshiligindegi 6-jeńis. Osyǵan deıin ol 2001, 2003, 2007, 2009 jáne 2010 jyldary Melbýrn tórinde top jarǵan bolatyn. Jalpy sporttyq ǵumyrynda 19 márte «Úlken dýlyǵa» týrnırinde jeńimpaz atanǵan. Al Marııa bul sanattaǵy saıystardy 5 márte utsa, sonyń bireýi Avstralııa ashyq birinshiligi edi. Reseı tennısshisi atalmysh týrnırdi 2008 jyly jeńdi.
Búginde Serena men Marııa sáıkesinshe álemniń birinshi jáne ekinshi raketkalary ekenin aıta keteıik.
Elaman Qońyr.
Derek: egemen.kz.
Sýret: ausopen.com.