ASTANA. 1 aqpan. Keshe Italııada 73 jastaǵy Serdjıo Mattarella prezıdent bolyp saılandy. Bul týraly Lenta.ru habarlady.
Memleket basshysy ıtalıan parlamentiniń eldegi barlyq oblystar ókilderiniń qatysýymen ótken otyrysy kezinde daýys berýi jolymen saılandy. Ol buǵan tórtinshi týrda bárinen kóp daýys alý arqyly qol jetkizdi.
Buryn eldiń Konstıtýsııalyq sotynda sýdıa bolyp qyzmet atqarǵan Serdjıo Mattarella Demokratııalyq partııanyń atynan kandıdat bolyp tirkelgen edi.
Ústimizdegi jylǵy 14 qańtar kúni eldiń 89 jastaǵy prezıdenti Djordjo Napolıtano densaýlyq jaǵdaıyna baılanysty otstavkaǵa shyqqan bolatyn.
Italııanyń Konstıtýsııasy boıynsha memlekettiń joǵary laýazymdy tulǵasy parlament arqyly saılanady. Ol barlyq oblystar ókilderiniń qatysýymen jabyq daýys berý jolymen ótkiziledi. Jeńimpaz barlyq jınalǵandardyń úshten eki bóliginen kóbirek daýys alǵansha daýys berý júre beredi.
Murat Aıtqoja.
Derek, foto: Lenta.ru.