Premer-mınıstrdiń orynbasary Tamara Dúısenovanyń Soltústik Qazaqstan oblysyna jumys sapary mańyzdy áleýmettik nysandardy aralaýdan bastaldy. Prezıdenttiń tapsyrmalaryn iske asyrý úshin Úkimet qabyldaıtyn ózekti máseleler men sharalar talqylandy.
Sapar barysynda vıse-premer Petropavldaǵy «Baldáýren» baqshasynda bolyp, mektepke deıingi bilim berý máseleleri boıynsha balabaqsha meńgerýshilerimen jınalys ótkizdi. Kezdesý barysynda mektepke deıingi bilim berý júıesindegi ózgerister men vaýcherlik qarjylandyrý júıesiniń engizilý máseleleri qaraldy. Bul mehanızm Petropavlda keler jyldyń mamyr aıynda iske qosylýy josparlanǵan. Qazirgi tańda qalada 49 balabaqsha 7 206 balaǵa qyzmet kórsetip jatyr.
Vaýcherlik qarjylandyrý júıesi Tarazda synaqtan ótip, Shymkent pen Túrkistan qalasynda qanatqaqty joba retinde júzege asyrylýda. Kelesi jyly bul júıe elimizdiń barlyq óńirinde engiziledi.
Vıse-premer balabaqsha men bastaýysh synyptardaǵy bilim berý baǵdarlamalaryn birizdendirýdiń mańyzyn atap ótip, bul úderiste balalardyń jeke damý kartalary róliniń erekshe ekenine mán berdi. Bul jańalyqtar «Barshaǵa qoljetimdi sapaly bilim» Ulttyq baıandamasynda qarastyrylǵan.
Maǵjan Jumabaev atyndaǵy IT-mektep-lıseıinde Tamara Dúısenova «Smart» ortalyǵy, robottehnıka kabıneti, qazaq tili men ádebıeti etnomádenı kabıneti, «Research» ortalyǵy jáne ınformatıka kabınetimen tanysty.
Sonymen qatar bilim berý basqarmalarynyń basshylary men mektep dırektorlarymen «Maqsatty mektepter» jobasyn júzege asyrý máselesi boıynsha kezdesý ótti. Bul joba 20 bilim oshaǵyn qamtıdy, onyń qatarynda 13-i – aýylda. Joba aıasynda ádistemelik qoldaý, pedagogterdiń biliktiligin arttyrý jáne oqý úderisin jaqsartý kózdelgen. Qazirgi ýaqytta ár mektep úshin jeke damý jospary ázirlenip, 10 ádisker-mentor men 500 muǵalim oqytylǵan.
О́ńir pedagogteri jobany iske asyrýdyń oń nátıjelerin aıtty. Máselen, Vozvyshenka orta mektebiniń dırektory Aıgúl Muqanova joba bilim berý mekemesiniń ishki máselelerin anyqtaýǵa jáne kórsetkishterdi jaqsartý boıynsha naqty is-qımyl josparyn ázirleýge kómekteskenin atap ótti.
«Bastapqyda bizdiń jobaǵa kóńilimiz tolmady, biraq jumys barysynda muǵalimderimiz onyń mańyzyn túsindi. Joba álsiz tustardy anyqtaýǵa sep boldy. Jobalaý keńsesimen tıimdi jumys isteý jolǵa qoıyldy, al júrgizilgen syrtqy baǵalaýlar ádistemelik jumysty jaqsartý úshin jeke jospar qurýǵa múmkindik berdi», dedi A.Muqanova.
Sondaı-aq vıse-premer Soltústik Qazaqstan joǵary qurylys-ekonomıkalyq kolledjinde dýaldy oqytý júıesimen tanysty. Kolledjde santehnıkalyq, dánekerleý, aǵash óńdeý, tas óńdeý jáne aspazdyq mamandyqtar boıynsha oqytý júrgiziledi. Vıse-premer kolledjdiń zamanaýı quraldarmen jabdyqtalǵan sheberhanalarynda oqytý úderisin kórip, stýdenttermen áńgimelesti.
Kolledjde tehnıkalyq jáne kásibı bilim berý uıymdarynyń basshylarymen kezdesý ótti. Prezıdenttiń Jumysshy mamandyqtary jyly týraly jarııalaǵanyn eskere otyryp, TjKB júıesin reformalaýǵa qatysty máseleler talqylandy. T.Dúısenova kolledjder óńir úshin kadr daıarlaýdyń negizgi bazasy bolýǵa tıis ekenine toqtaldy.
Qazirgi tańda oblysta 24 kolledj bar, olarda 11 myńnan asa stýdent bilim alýda. 13 kolledj jumysshy mamandyqtar boıynsha kadrlar daıarlaıdy, kolledjder men kásiporyndar arasynda 1 726 kelisimshart jasalǵan jáne túlekterdiń jumysqa ornalasý deńgeıi 97%-dy quraıdy.
«Bilim berý júıesi ózara baılanysty, birizdi jáne tulǵany damytýǵa arnalǵan kóp deńgeıli júıe bolýǵa tıis. Bul úderis barysynda pedagogterimizdiń róli zor. Men olardyń elimizdiń laıyqty azamattaryn tárbıeleý úshin bar kúsh-jigerin jumsaıtynyna senimdimin», dedi vıse-premer.
T.Dúısenova Petropavldaǵy jańa ústel tennısi ortalyǵynda bolyp, óńirdegi sport uıymdarynyń basshylarymen kezdesti. Onda sport salasyndaǵy reformalarǵa, onyń ishinde basqarýdyń vertıkal máselelerine jáne óńirdiń balalar men jasóspirimder sport mektepterine jan basyna shaqqandaǵy qarjylandyrýdy engizýge basty nazar aýdaryldy. Talqylaý barysynda osy máseleler boıynsha ashyq pikir almasý ótti. Qazirgi ýaqytta Týrızm jáne sport mınıstrliginde sala ókilderimen konsýltasııalar júrgizetin arnaıy jumys toby jumys isteıdi. Aıtylǵan usynystar men eskertýler túpkilikti qujatty daıyndaý kezinde eskeriledi.