О́SKEMEN. 30 sáýir. Shyǵys Qazaqstannyń Zyrıan aýdanyndaǵy birqatar eldi-mekenderge gýmanıtarlyq kómek kórsetildi. Bul týraly egemen.kz habarlady.
Zyrıan aýdanyna qarasty Zýbovsk, Maleevsk, Pýtınsevo, Parygıno, Baıanovsk, Bykovo jáne Snegırovo aýyldary tasqyn sýdan aıtarlyqtaı zardap shekti. Osyǵan oraı Shyǵys Qazaqstan oblysynyń ákimi Danıal Ahmetovtiń tapsyrmasymen jaǵdaıdy baqylaý jónindegi jumys toby quryldy.
Aımaq basshysynyń tapsyrmasymen top jetekshisi Dımıtrıı Garıkov sý astynda qalǵan eldi-mekenderdi tikushaqpen aralap kórip, barlyq ınjenerlik qurylǵylardy tekserip shyqty.
Dımıtrıı Garıkovtyń aıtýynsha, aýdandaǵy toǵan óz mindetin atqarǵanymen, ondaǵy jınalǵan sý deńgeıi qaýipti mólsherden asyp ketken.
Búginde Zyrıan aýdanynda turǵyndardy kóshirý jáne sý basqan aımaqty qalpyna keltirý úshin 230 adam men 50 tehnıka jumys isteýde. Olarǵa jergilikti turǵyndar da kómektesip jatyr.
Aıta keteıik, óńirde tasqynnan zardap shekken aýdan turǵyndaryna gýmanıtarlyq kómek retinde 60 tonnadan astam taýarlar men azyq-túlik tıelgen alǵashqy avtokerýen jóneltildi. Avtokerýendi jasaqtaýǵa О́skemen qalasy men Kúrshim, Ulan, Glýbokoe, Shemonaıha, Katonqaraǵaı aýdandarynyń kásipkerleri belsendi kómektesken.
Dýman Anash.
Derek, sýret: egemen.kz.