Tarıhy tereń qasıetti Qarqara aýylynda eńseli ekiqabatty mádenıet úıi paıdalanýǵa berilip, el qýanyshy eselendi.
Aýyldyń ortalyq kóshesiniń boıynan oıyp oryn alǵan ǵımarattyń syrt kelbeti kóz súısintedi. Al tabaldyryǵyn attap ishke kirgen adamnyń rýhy asqaqtap, jan dúnıesine mádenıettiń sáýlesi sebezgileıdi. Budan bylaı qarqaralyq qaradomalaq balalardyń boıyna rýhanı nár berip, ónerdiń qudiretin sezindiretin mádenıet úıinen naǵyz talanttar tárbıelenip, tomaǵasyn sypyratyny týraly saltanatty sharaǵa qatysqan el aǵalary men óner ókilderi atap aıtty.
Kıeli ólkede Qazaqstan Respýblıkasynyń eńbek sińirgen qaıratkeri, Memlekettik syılyqtyń ıegeri, akter Nurqanat Jaqypbaı, «Qurmet» ordeniniń ıegeri, jýrnalıst, jazýshy Jaqypjan Nurǵojaev, Qazaqstannyń eńbek sińirgen qaıratkeri, kıno jáne teatr akteri Omar Qyıqym, Qazaqstannyń eńbek sińirgen qaıratkeri, kúıshi, kompozıtor Ermurat Úsenov, fılosofııa ǵylymdarynyń doktory, professor Sveta Berdibaeva, Qazaq jýrnalıstıkasynyń qaıratkeri Saǵatbek Medeýbekuly jáne basqa da esimi elge tanymal aqyndar men qalamy qarymdy jýrnalısterdiń kindigi kesilgenin eskerer bolsaq, bulardyń qatary áli talaı daryndarmen tolyǵa túseri aıdan anyq.
Aýyl turǵyndary kópten kútken ıgi istiń ashylýyna Almaty oblysynyń mádenıet, arhıvter jáne qujattama basqarmasynyń basshysy Danııar Álıev, oblystyq dene shynyqtyrý jáne sport basqarmasynyń basshysy Erbolat Sarabekuly, jazýshy Aqsáýle Ábdihalyqqyzy, ádebıet synshysy Baǵashar Tursynbaıuly men qarqaralyq óner maıtalmandary, qoǵamdyq uıym ókilderi qatysty.
«Shalǵaı aýyldardyń ishki túıindi máselelerin ornymen sheship otyrý – memleketimizdiń basty nazarynda. Oblys ákimi Marat Eleýsizulynyń qoldaýynyń arqasynda aýdannyń mádenıet salasyna tyń serpin berildi. О́ńirdegi Jalaǵash, Bóleksaz, Jylysaı aýyldarynda zamanaýı mádenıet úıleri salynýda. Qarabulaq mádenıet úıi kúrdeli jóndeýden ótkizilýde. Sonymen qatar 157 mln teńgege mádenıet oshaqtary jyljymaly sahna, dybys kúsheıtkish quraldarmen, sahnalyq kıimdermen tolyǵýda. Jarqyn jobalardyń júzege asýy – eń aldymen, elimizdiń órkendep ósýimen qatar, jastarymyzdyń densaýlyǵyn nyǵaıtýǵa, mádenıet pen ónerdiń keńinen taralýyna yqpal eteri sózsiz», – dedi aýdan ákimi Nurbaqyt Teńizbaev.
Jańadan ashylǵan mádenı nysan aýyl halqynyń bos ýaqytyn tıimdi paıdalanýyna jáne túrli taqyryptarda mádenı is-sharalar ótkizýge arnalǵan. Sport zalmen biriktirilgen mádenıet úıi zamanaýı qurylǵylarmen tolyqtaı jabdyqtalǵan. Tipten, lıft te iske qosylǵan. Munda myńǵa tarta kitap qory bar kitaphana men óner úıirmeleri jumys isteıtin bolady.
«Kıeli Kegen aýdanynyń kóz súısinter tabıǵaty men syr tunǵan tarıhyn taspalap, aýdannyń fotoshejiresin jasaýdamyz. Ony aldaǵy ýaqatta tabystaıtyn bolamyz. Keleshekte osy ǵımaratta fotograf bolýǵa nıetti balalar bolsa 2-3 kúndik dáris ótkizip, tájirıbemmen bólisýge daıynmyn. Mundaı óner oshaǵy bos turmaı, aýyl balalarynyń talantyn ashyp, talabyn ushtaýǵa qyzmet etýi kerek», – dedi turǵyndardy qýanyshymen quttyqtaǵan respýblıkalyq «Fotoóner» qoǵamdyq birlestiginiń tóraǵasy, kásibı fotograf Asylhan Ábdyraıymuly.
Saltanatty shara barysynda týǵan aýylynyń ajaryn ashyp, kórkin kirgizgen mádenıet úıiniń salynýyna atsalysqan azamattarǵa osy aýyldan túlep ushqan óner qaıratkerleri Nurqanat Jaqypbaı men Saǵatbek Medeýbekuly júrekjardy alǵystaryn jetkizdi.
Budan keıin keń saraıdaı mádenıet úıiniń alqyzyl lentasy qıylyp, kımeshek kıgen ájeler shashý shashty. Aýyl halqy alǵash ret jaıly da jumsaq oryndyqqa jaıǵasyp, aýdandyq kórkemónerpazdar ansambiliniń konserttik baǵdarlamasyn tamashalady.
Sondaı-aq bul kúni sport zalmen biriktirilip salynǵan ǵımaratta aýdan voleıbolshylarynyń aqtyq oıyny ótip, jarys jeńimpazdary qomaqty qarjy, baǵaly syılyqtarmen marapattaldy. Osylaısha ónerpazdar men sportshylar qatar óner kórsetken sý jańa mádenıet úıi – jan jadyratar jarqyn ister men jetistikterdiń jyly uıasyna aınalmaq.
Almaty oblysy