Almaty mýzeıinde qazaqtyń tuńǵysh akademıgi, Qazaq KSR Ǵylym akademııasyn uıymdastyrýshy, onyń tuńǵysh prezıdenti, keńes odaǵy men Qazaqstannyń metallogenııa mektebiniń negizin qalaýshy, alǵashqy Memlekettik syılyqtyń laýreaty, geolog-ǵalym Qanysh Sátbaevtyń týǵanyna 125 jyl tolýyna oraı «Ǵylymǵa arnalǵan ǵumyr» atty kórme ashyldy.
Tarıhı tulǵanyń mereıtoıy aıasynda ótkizilgen kórme Ulttyq ǵylym akademııasynda ornalasqan Q.Sátbaevtyń memorıaldy mýzeıi jáne 1999 jyly akademık esimimen atalǵan Satbayev University tarıhı mýzeıimen birlesip uıymdastyryldy. Ashylý saltanatyna Q.Sátbaevtyń jıeni, geologııa-mınerologııa ǵylymdarynyń doktory Aleksandr Tretıakov ta qatysyp, alty jasyna deıin qasynda erkelep ósken atasy týraly estelikter tıegin aǵytyp, ómirlik maqsatyn belgileýine yqpaly bolǵan umytylmas tulǵany yqylaspen eske aldy.
Ulttyń birtýar perzentiniń rýhyna taǵzym jasap kelgender gıperrealıst músinshi Aıdos Esmaǵambetovtiń «Qanysh Sátbaev» atty sılıkonnan jasaǵan tyń týyndysyna birden nazar aýdardy. Akademık Qanysh Sátbaevtyń murasy Qazaqstannyń ǵylym jáne bilim tarıhynda mańyzdy oryn alady. Eki ekspozısııalyq bólimnen turatyn kórmede ǵalymnyń jeke zattary men jeke muraǵaty usynylǵan. Jazý máshińkesi, kitap kartotekasy, memlekettik nagradalary, dombyrasy, geolog ǵalymnyń izdenisimen tabylǵan, biregeıligimen jáne erekshe túsimen kóz tartatyn ametıst, holkazın, volframıt sııaqty tabıǵı mıneral tastary, sondaı-aq Q.Sátbaevtyń geologııalyq qazba jumystarynda qoldanǵan qaılasy, balta, balǵasy, jel men kúnniń ótinde júrip aqjemge aınalǵan qara bylǵary kúrtesi, etigi, portfeli ǵylym jolynda jankeshti ǵumyr keshken ǵalymnyń ótken ómirin bir sátke kóz aldyna ákelip, tarıhı tutastyqta baıandaıdy.
Kórmege geologııa jáne metallogenııa salasyndaǵy zertteýlerin qosa alǵanda, otandyq ǵylymdy odan ári damytý úshin negiz bolǵan ǵylymı jetistikterine arnalǵan muraǵattyq fotosýretter, qujattar men maqalalary, ǵylymı eńbekteri, basqa da materıaldar ótken kúnnen syr shertedi. Elimizde geologııa men metallýrgııany damytýda sheshýshi ról atqarǵan kórnekti ǵalym Q.Sátbaevtyń ómiri hám qyzmetimen, ǵylymı jetistikterimen jáne otandyq ǵylymnyń damýyna qosqan úlesimen tanysýǵa keń múmkindik beredi.
ALMATY