Tarıhy tereń qasıetti Qarqara aýylynda qosqabatty mádenıet úıi paıdalanýǵa berilip, el qýanyshy eselendi. Aýyldyń ortalyq kóshesiniń boıynan oıyp oryn alǵan ǵımarattyń syrt kelbeti kóz toıarlyq. Al tabaldyryǵyn attap ishke kirgen adamnyń rýhy asqaqtap, jan dúnıesine mádenıettiń sáýlesi sebezgileıdi.
Kıeli ólkede Qazaqstannyń eńbek sińirgen qaıratkeri, Memlekettik syılyqtyń laýreaty, akter Nurqanat Jaqypbaı, «Qurmet» ordeniniń ıegeri, jazýshy Jaqypjan Nurǵojaev, Qazaqstannyń eńbek sińirgen qaıratkeri, kıno jáne teatr akteri Omar Qıqym, Qazaqstannyń eńbek sińirgen qaıratkeri, kúıshi, kompozıtor Ermurat Úsenov, fılosofııa ǵylymdarynyń doktory, professor Sveta Berdibaeva, Qazaq jýrnalıstıkasynyń qaıratkeri Saǵatbek Medeýbekuly, basqa da esimi elge tanymal aqyndar men qalamy qarymdy jýrnalısterdiń kindigi kesilgenin eskersek, bulardyń qatary áli talaı daryndarmen tolyǵa túseri anyq.
Aýyl turǵyndary kópten kútken nysannyń ashylýyna Almaty oblysynyń Mádenıet, arhıvter jáne qujattama basqarmasynyń basshysy Danııar Álıev, oblystyq dene shynyqtyrý jáne sport basqarmasynyń basshysy Erbolat Sarabekuly, jazýshy Aqsáýle Ábdihalyqqyzy, ádebıet synshysy Baǵashar Tursynbaıuly, qarqaralyq óner maıtalmandary, qoǵamdyq uıym ókilderi qatysty.
«Shalǵaı aýyldardyń ishki túıindi máselelerin ornymen sheship otyrý – memleketimizdiń basty nazarynda. Oblys ákimi Marat Eleýsizulynyń qoldaýymen aýdannyń mádenıet salasyna tyń serpin berildi. О́ńirdegi Jalaǵash, Bóleksaz, Jylysaı aýyldarynda zamanaýı mádenıet úıleri salyndy. Qarabulaq Mádenıet úıi kúrdeli jóndeýden ótip jatyr. Sonymen qatar 157 mln teńgege mádenıet oshaqtary jyljymaly sahna, dybys kúsheıtkish quraldarmen, sahnalyq kıimdermen tolyqty. Jarqyn jobalardyń júzege asýy – eń aldymen, elimizdiń órkendep ósýimen qatar, jastarymyzdyń densaýlyǵyn nyǵaıtýǵa, mádenıet pen ónerdiń keńinen taralýyna yqpal eteri sózsiz», dedi aýdan ákimi Nurbaqyt Teńizbaev.
Jańadan ashylǵan mádenı nysan aýyl halqynyń bos ýaqytyn tıimdi paıdalanýyna, túrli taqyrypta mádenı is-sharalar ótkizýge arnalǵan. Sportzalmen biriktirilgen mádenıet úıi zamanaýı qurylǵylarmen tolyqtaı jabdyqtalǵan. Tipten, lıft te iske qosylǵan. Munda myńǵa tarta kitap qory bar kitaphana men óner úıirmeleri jumys isteıtin bolady.
«Kıeli Kegen aýdanynyń kóz súısinter tabıǵaty men syr tunǵan tarıhyn taspalap, aýdannyń fotoshejiresin jasaýdamyz. Ony aldaǵy ýaqytta tabystaımyz. Keleshekte osy ǵımaratta fotograf bolýǵa nıetti balalar bolsa, 2-3 kúndik dáris ótkizip, tájirıbemmen bólisýge daıynmyn. Mundaı óner oshaǵy bos turmaı, aýyl balalarynyń talantyn ashyp, talabyn ushtaýǵa qyzmet etýi kerek», dedi turǵyndardy qýanyshymen quttyqtaǵan respýblıkalyq «Fotoóner» qoǵamdyq birlestiginiń tóraǵasy, kásibı fotograf Asylhan Ábdyraıymuly.
Saltanatty is-shara barysynda týǵan aýylynyń ajaryn ashyp, kórkin kirgizgen mádenıet úıiniń salynýyna atsalysqan azamattarǵa osy aýyldan túlep ushqan óner qaıratkerleri Nurqanat Jaqypbaı men Saǵatbek Medeýbekuly júrekjardy alǵysyn jetkizdi.
Budan keıin keń saraıdaı mádenıet úıiniń alqyzyl lentasy qıylyp, kımeshek kıgen ájeler shashý shashty. Aýyl halqy alǵash ret jaıly da jumsaq oryndyqqa jaıǵasyp, aýdandyq kórkemónerpazdar ansambiliniń konserttik baǵdarlamasyn tamashalady.
Sondaı-aq bul kúni sportzalmen biriktirilip salynǵan ǵımaratta aýdan voleıbolshylarynyń aqtyq oıyny ótip, jarys jeńimpazdary baǵaly syılyqtarmen marapattaldy. Osylaısha ónerpazdar men sportshylar qatar óner kórsetti. Mádenıet úıi aldaǵy ýaqytta jarqyn ister men jetistikterdiń jyly uıasyna aınalmaq.
Almaty oblysy