NIS oqytýshylary «Qazaqstan muǵalimi» ulttyq syılyǵynyń fınalısi atanyp, úzdik pedagogterdiń ondyǵyna endi. Kelesi jyly olar «Global Teacher Prize» halyqaralyq baıqaýynda el namysyn qorǵaıdy.
Qyzylordadaǵy Nazarbaev zııatkerlik mektebiniń muǵalimi Gúlzat Shyntasova úshin bul jol ońaı bolmaǵan. Ol 2011 jyly ýnıversıtetti aıaqtaǵan soń, bilimin magıstratýrada jalǵastyryp, 2013 jyly jańadan ashylǵan mektepte pedagog-uıymdastyrýshy-kýrator bolyp qyzmetke ornalasqan. Keıin óz mamandyǵy boıynsha sabaq berýge kóship, kásibı deńgeıin únemi arttyryp otyrǵan.
Gúlzat Býrabaıqyzy — Bilim media group uıymdastyrǵan «Jańashyl ustaz – 2018» respýblıkalyq baıqaýynyń jeńimpazy, Qyzylorda oblystyq «О́rleý» ortalyǵynyń «Pedagogıkalyq ıdeıalar panoramasy» baqaýynyń I oryn ıegeri jáne termın sózderdi qazaqshalaý boıynsha respýblıkalyq baıqaýda Bas júlde jeńip aldy. Sondaı-aq ol «Ádebı esse» elektıvti kýrsynyń avtory, jalpy bilim beretin mektep muǵalimderine arnalǵan «Onlaın mektep» jobasy tapsyrmalaryn qurastyrýshy, til máselesine qatysty aımaqtyq sharalardyń turaqty spıkeri, «Til-qazyna» ulttyq ǵylymı-praktıkalyq ortalyǵynyń lıngvıst mamany.
«Qazaqstan muǵalimi baıqaýyn 2019 jyldan beri baqylap júrmin, biraq bes jyldan keıin ǵana ótinim berýge bel býdym. Jeńis dámin tatqan sátimdi, sahna tórindegi qýanysh sezimin sózben aıtyp jetkize almaımyn. Sol sátte birese qýanyshtan jylap, birese ózimmen maqtanyp, endi birde qutty mekenime aınalǵan Nazarbaev zııatkerlik mektebine alǵys aıtýmen boldym. Mundaı baıqaýlar adamdy shyńdaıdy eken. Ári qaraı durys baǵytpen jumys jasaýǵa talpyndyrady. Bıikke shyǵý bar, ony qulamaı ustap turý bar. О́zime aldaǵy ýaqytta shyńdardy baǵyndyrý ǵana buıyrsyn dep tiledim. Álem muǵalimi Zef hanymnyń qolynan marapat alǵanymdy da jaqsylyqqa jorydym. Bálkim, álemdi baǵyndyrý buıyryp qalar degen úmit bar», deıdi ol.
Qostanaıdaǵy Nazarbaev zııatkerlik mektebi ınformatıka pániniń muǵalimi Aleksandr Sherser de kásibıligimen tanylǵan. Ol – «ictlab.kz» bilim portalynyń negizin qalaýshy ári «NIS Online» biliktilikti arttyrý kýrstarynyń birlesken avtory. Y.Altynsarın medaliniń ıegeri atanǵan muǵalim oqýshylardyń bilimin arttyrýǵa baǵyttalǵan birqatar sıfrlyq platforma jasap, el ıgiligine usynǵan, Atap aıtsaq, Aleksandr «Qazaq tilinde sóıleýdi taný jáne sıntezdeý vırtýaldy daýystyq assıstenti» men «Qazaq Oriented Language» baǵdarlamalaý tilin jasap shyǵarǵan. Sondaı-aq ol «Jaıly mektep» jobasynyń pándik jumys tobyn basqarady.
«Altyn uıa mektepti anaǵa teńeýge bolatyn shyǵar. О́ıtkeni ekeýi de – árbirimizdiń júregimizge jaqyn, jyly sózder. Rasynda, leksıkalyq jaǵynan ártúrli maǵyna bergenimen, bir-birimen tyǵyz baılanysty. Otbasy men mektep árqashan bilim men mádenıetti baıytatyn orta deýge bolady», deıdi A.Sherser.
Al Taraz qalasyndaǵy Nazarbaev zııatkerlik mektebi fızıka pániniń muǵalimi Mırlan Jýsambaev – «TikTok»-ta ǵylymdy nasıhattap júrgen belsendi ustaz. Ol byltyr «Jyldyń úzdik muǵalimi» atanyp, CLIL ádisnamasymen aǵylshyn tilin jaratylystaný-ǵylymı pándermen ıntegrasııalaý salasynda zertteýler júrgizip keledi. Onyń ǵylymı eńbekteri Italııada jáne Armenııada ótken halyqaralyq konferensııalarda joǵary baǵalanǵan. Bilim salasyndaǵy zertteýshiler qaýymdastyǵynyń múshesi retinde ol jaratylystaný ǵylymdaryn kópshilikke qoljetimdi ári qyzyqty etýge erekshe kóńil bóledi.
«Qazaqstan muǵalimi» ulttyq syılyǵy – elimizdiń barlyq muǵalimi úshin óte mańyzdy joba. Baıqaýdyń arqasynda bilimimizben ǵana shektelip qalmaı, jan-jaqty izdenemiz. О́ıtkeni muǵalim únemi damyp otyrýy kerek», dep atap ótti M. Jýsambaev.
Úsh ustazdyń árqaısysy óz salasynda túrli jetistikke jetken. Olar elimizdiń pedagogıkalyq áleýetin álemge tanytýǵa daıynbyz deıdi. Sondyqtan NIS muǵalimderiniń «Global Teacher Prize» baıqaýynda elimizdiń abyroıyn asqaqtatady degen senim mol.