Ǵylym jáne joǵary bilim mınıstrligi Ulttyq biryńǵaı testileýge (UBT) qatysty máselelerdi túsindirdi, dep habarlaıdy Egemen.kz.
2023-2024 jyldary Dúnıejúzilik banktiń «Jalpy bilim berýdi jańǵyrtý» jobasy aıasynda elimizdiń túkpir-túkpirinen iriktelgen 350 sarapshy UBT tapsyrmalaryn ázirleý jáne saraptaý boıynsha oqý kýrsyn aıaqtady.
Oqyǵan mamandar Ulttyq testileý ortalyǵy uıymdastyratyn is-sharalarǵa belsene qatysyp, biliktilikterin arttyrýdy jalǵastyryp jatyr. Sondaı-aq ortalyq mýltımedııalyq elementter men joǵary deńgeıdegi kognıtıvtik daǵdylardy baǵalaıtyn ınteraktıvti áreketterdi qurýǵa arnalǵan ınnovasııalyq jańa onlaın platformasyn ázirlep jatyr.
«Bul platforma ártúrli tıptegi tapsyrmalardy ázirleýge múmkindik berip, UBT tapsyrmalarynyń sapasyn aıtarlyqtaı jaqsartady», dep habarlady Ǵylym jáne joǵary bilim mınıstrligi.
Buǵan deıin, 2021 jylǵy 3 jeltoqsanda Dúnıejúzilik banktiń «Jalpy bilim berýdi jańǵyrtý» jobasy boıynsha baıandamasy negizinde halyqaralyq konsýltanttardyń usynystary eskerilgen edi.
«2024 jyly UBT-ǵa sáıkestikti baǵalaý úshin mýltımedııalyq elementteri bar tapsyrmalar engiziledi», delingen vedomstvo aqparatynda.