Abaı atyndaǵy Qazaq ulttyq pedagogıkalyq ýnıversıtetiniń fılologııa fakýltetinde Qytaı tili jáne qytaıtaný kafedrasynyń saltanatty ashylý rásimi ótti.
Atalǵan kafedranyń ashylýy tildik, mádenı quzyrettilikterdi jetildirý arqyly eki el arasyndaǵy baılanysty nyǵaıtý, qosdıplomdyq bilim berý negizinde oqytý, akademııalyq utqyrlyq máselesin jolǵa qoıý, qytaı ýnıversıtetterimen, ǵylymı zertteý ortalyqtarymen yntymaqtastyq ornatý, jahandaný kezeńinde stýdentterdi til, ádebıet, aýdarma, halyqaralyq qatynastar, bıznes, bilim berý jáne ǵylym salalarynda jumys isteý úshin qytaı tili men mádenıeti, tarıhy boıynsha tereń bilimmen qamtamasyz etýdi maqsat etedi.
Qytaı tili jáne qytaıtaný kafedrasynyń ashylýy aıasynda «Kalıgrafııany oqytýda sıfrlyq tehnologııany qoldaný ereksheligi» atty ǵylymı semınar ótti. Atalǵan semınarda Szıansı ǵylym-tehnologııa pedagogıkalyq ýnıversıtetiniń professorlary Chen Sıýpın men Iý Chao ǵylymı baıandama jasady.
Abaı atyndaǵy Qazaq ulttyq pedagogıkalyq ýnıversıtetiniń rektory Bolat Tilep kafedranyń ashylý saltanatynda ýnıversıtettiń sapaly bilim berý júıesin odan ári jetildirýge, ustazdarymyzdyń kásibı ósýine jáne stýdentterdiń bilimi men shyǵarmashylyq áleýetin halyqaralyq deńgeıde damytýǵa, eki el arasyndaǵy bilim-ǵylym salasyndaǵy yntymaqtastyqty keńeıtýge yqpal etý maqsatynda ashylyp otyrǵan Qytaı tili jáne qytaıtaný kafedrasynyń aldaǵy jumysyna sáttilik tileıtindigin atap ótti.
Prezıdent Qasym-Jomart Toqaev pen QHR-dyń basshysy Sı Szınpınmen Astanadaǵy ótken kezdesýinde: «Qazaqstan men Qytaı arasyndaǵy qarym-qatynastyń deńgeıi qashanda joǵary, eki eldiń seriktestigi Birikken Ulttar Uıymy, Shanhaı yntymaqtastyq uıymy, Azııadaǵy ózara is-qımyl jáne senim sharalary jónindegi keńes aıasynda tabysty damyp kele jatyr», degen edi. Sonyń negizinde Ǵylym jáne joǵary bilim mınıstri Saıasat Nurbek: «Elimizde ulttyq joǵary oqý oryndarynda qytaı tili kafedrasy ashylady, qytaı tili ekinshi shet tili retinde oqytylady», dep málimdegen. Osy maqsatta eki eldiń tıisti mınıstrlikteri birqatar kelisimshartqa qol qoıǵan bolatyn. Qytaı tili jáne qytaıtaný kafedrasy eki el basshylarynyń ýaǵdalasqan kelisimderine oraı Abaı ýnıversıtetinde atqarylyp otyrǵan mańyzdy is-shara ekeni aıqyn.
Osy rette stýdentter qytaı tiliniń negizderin ǵana emes, sonymen qatar sol eldiń baı mádenıetin, dástúrin, qundylyqtary men dúnıetanymyn tereń meńgerýge múmkindik alatyndyǵyn da aıta ketkenimiz jón. О́ıtkeni Qytaı eli – qaıtalanbas jáne ejelgi kóne dástúrlerge baı, kópǵasyrlyq tarıhy, erekshe fılosofııasy jáne qarqyndy damyp kele jatqan ekonomıkasy bar el. Al qytaı tili – álemdegi eń kóne ári zamanaýı tilderdiń biri. Bul eldiń mádenıetin tili arqyly taný, zertteý álemdi tereńirek túsinýge jáne adamzat rýhanııatyn baıytýǵa múmkindik beredi dep oılaımyz.
Atalǵan is-sharaǵa QHR-dyń Almaty qalasyndaǵy Bas konsýldyń akademııalyq máseleler jónindegi dırektory Hýan Sıaomın, QHR-dyń Szıansı ǵylym-tehnologııa pedagogıkalyq ýnıversıtetteriniń basshylary, ǵalymdary, QHR-dyń Gýandýn óndiristik-tehnıkalyq ýnıversıtetiniń ǵalymdary, Ál-Farabı atyndaǵy QazUÝ, Abylaı han atyndaǵy QazHQjÁTÝ-dyń tanymal ǵalymdary, Abaı atyndaǵy QazUPÝ oqytýshylary qatysyp, izgi tilekterin bildirdi.
Qazir fakýltette 300-den asa stýdent qytaı tili mamandyǵy boıynsha bilim alyp jatyr. Qytaı tilin úırenýge degen suranys jyldan-jylǵa ósip keledi. Sol suranysqa baılanysty ýnıversıtetimizde Qytaı tili jáne Qytaıtaný kafedrasy resmı túrde ashylyp, óz jumysyn bastamaq. Atalǵan kafedra bolashaqta qytaı tilin meńgergen, joǵary bilikti mamandardy daıarlaý isine úlken úles qosady degen senimdemiz.
Alýa TAŃJARYQOVA,
Abaı atyndaǵy QazUPÝ fılologııa fakýltetiniń dekany