Mańǵystaý oblysynyń prokýratýrasy «Kaspıı» fýtbol klýbynda oqý-jattyǵý jıyndaryna bólingen 27 mln teńgeden astam qarajat urlanǵanyn anyqtady, dep habarlaıdy Egemen.kz.
Bas prokýratýranyń málimetinshe, oblystyń sybaılas jemqorlyqqa qarsy qyzmeti UQKD-men birlesip, osy faktini tergeý barysynda klýbtyń burynǵy basshysy óziniń 2 tanysymen birge, kúsh qoldaný arqyly klýbtyń qyzmetkerin aıǵaqtardy ózgertýge májbúrlegeni belgili bolǵan.
«Sonymen qatar sońǵydan 15 mln teńge qorqytyp alýǵa árekettengen. 03.12.2024 j. fýtbol klýbynyń eks-basshysyn, «K» jáne «O» azamattaryn qamaýǵa alýǵa sanksııa berildi», delingen habarlamada.
Basqa málimetter tergeý múddesi úshin jarııa etilmeıdi.