Gaz qubyry jaryldy

Beles aýyly tusyndaǵy joǵary qysymdaǵy turba jarylyp, sonyń saldarynan osy mańdaǵy 16 eldi meken gazsyz qaldy. Keshe túngi saǵat úshtiń shama­synda Zelenov aýdany aýma­ǵyn­­da tótenshe jaǵdaı oryn al­dy. Osy óńirge qarasty Beles aýy­ly tusynda «Orynbor-Novopskov» magıstraldi gaz qu­by­ry oryn tepken bolatyn. So­nyń 283-shaqyrymynda «InterGazOrtalyqAzııa» AQ-tyń teńgerimi bar. Osy ıirimin­degi  joǵa­ry qysymdaǵy turba qubyry jaryl­dy. Bul qubyr jer astymen júr­gizilgen. Sonyń saldarynan atalǵan aralyq tún ishinde otqa orandy. Qazirgi kúni jarylystyń saldarynan on alty eldi meken gazsyz qalyp otyr. Batys Qazaqstan oblystyq tó­ten­she jaǵdaılar jónindegi de­partamentiniń bólim basshysy Marat Otarovtyń aıtýynsha oqıǵa ornyna 45 adam, 12 tehnıka jetkizilgen. Oǵan oblystyq Ish­ki ister departamentiniń qura­my da ju­myldyrylǵan. «In­terGazOrtalyqAzııa» AQ-tyń Oral magıstraldi basqar­masynyń mamandary men arnaıy tehnıkalary da gaz qubyry jarylǵan jerden tabyldy. «Semser» órt sóndirý JShS-niń ujymy da alaýdy sóndirýge bir kisideı jumyldy. Keshegi kúndizgi saǵat 12.00-degi málimet boıynsha Zelenov aýdanynda 9 eldi meken ýaqytsha gazsyz qalyp otyr. Zelenov aýdany boıynsha 32 áleýmettik nysan ýaqytsha tabıǵı gaz berilý tártibinen ajyratylǵan. Sonyń ishinde 11 mektep, 3 balabaqsha, 14 mádenıet jáne densaýlyq saqtaý nysandarynyń bolýy jarylystyń zardabynyń az emes ekenin kórsetedi. Búgingi kúni gaz qubyrynyń jarylýyna baılanysty arnaıy komıssııa quryldy. Olar apat­tyń oryn alý sebepterin anyq­taýǵa kiristi. Qazir tutanǵan órt sóndirilgen. Budan keıingi kezek­te qaıta qalpyna keltirý ju­mystary júrgizilýde. Ázirge bul tehnogendik sıpatta bolǵan oqıǵa degen boljam jasalyp otyr. Temir QUSAIYN, «Egemen Qazaqstan». Batys Qazaqstan oblysy, Zelenov aýdany.