Nura aýdany Qaınar aýylynda – úlken qýanysh. О́tken aptada jańa ákimdiktiń saltanatty túrde ashylý rásimi ótti. Buǵan deıin aýyl ákimdigi tozyǵy jetken ǵımaratta jumys atqaryp kelgen edi.
Osy ýaqytqa deıin «Qaınar» JShS mekemesiniń aıadaı ǵana jerinde aýyldyń ýchaskelik ınspektory, vetınspeksııa mamandary men ákimdik mamandary jumys istep keldi. Sodan eski ákimdik ǵımaratyn súrip tastap, qabyrǵasyn keńeıtip qaıta turǵyzdy. Joǵaryda atap ótken qyzmetkerlerdiń árbirine jańa mekemeden árbiriniń kirip shyǵatyn esigi bólek kabınet berildi. Endi poshta mamany da osynda otyrady. Jańa ákimdik barlyq qajetti jabdyqpen qamtamasyz etildi.
Jańa ǵımarattyń qurylysyna memlekettik bıýdjetten 13 mln teńge qarajat bólindi. Onymen qosa «Qaınar» jaýapkershiligi shekteýli seriktestigi 22 mln teńge aýdaryp, demeýshilik kórsetken.
Ákimdiktiń lentasyn aýdan ákimi Baqytjan Muqanov, «Qaınar» JShS basshysy Seıitjappar Nyǵmetov pen Atymtaı jomart Qanat Otarbaev qıyp, ıgi lebizderin bildirdi.
«Yntymaq, birligi jarasqan aýylymyzben árdaıym maqtanamyz. Osy bir sharýa kópten beri el azamattarynyń esinde júr edi. Mine, jarqyraǵan jap-jańa ákimdik el ıgiligine qyzmet atqarady. Ákimshilik aýylymyzdyń júregi sekildi. О́ıtkeni barlyq aýyl úshin jasalatyn ıgi qyzmetter osy jerden bastaý alyp, sheshim tabady. Aýylǵa hal-qaderimizshe qyzmet ete beremiz», deıdi jomart júrek Seıitjappar Alshynbekuly.
Aýyl ákimi Azamat Sadyqov jap-jańa ǵımarat tartý etken aýdan ákimdigi men «Qaınar» JShS basshysyna rııasyz alǵysyn jetkizdi. Aýyldyń sharýa qojalyqtary týǵan jerdiń órkendeýine zor úles qosyp otyrǵan Seıitjappar Nyǵmetovke shapap jaýyp, sáıgúlik mingizdi.
Aýylyna sharapat tógip otyrǵan sharýashylyq egin egip qana qoımaı, mal tuqymyn asyldandyrýmen de júıeli aınalysyp keledi. Jyl saıyn otandyq jáne sheteldik aýyl sharýashylyǵyna qajetti tehnıkanyń túr-túrin satyp alyp otyrady. О́ıtkeni jumystyń negizgi kúshi sol. Seıitjappar Alshynbekuly – qashannan aýyldyń áleýmettik jaǵdaıyna alańdaǵan azamat. Aýyldaǵy dárigerlik ambýlatorııa, Mádenıet úıi, meıramhana, monsha, naýbaıhana – sharýashylyqtyń qarjysyna jasalǵan ıgi ister. Aýyldaǵy buqaralyq sportty damytý úshin keshendi sportzal salyp bergen. Sharýashylyq demeýshiligimen meshit te boı kótergen. Memleket-jekemenshik seriktestigi arqyly balabaqsha da jumysyn atqaryp otyr. Buǵan qosa irgeli sharýashylyq aýyldaǵy el-jurtqa jumys berip otyr.
Qaraǵandy oblysy,
Nura aýdany,
Qaınar aýyly