Shıeli aýdanynda «Bıdaıkól» dárigerlik ambýlatorııasy paıdalanýǵa berildi. Densaýlyq saqtaý mekemesiniń qurylysyna oblystyq bıýdjetten 79 mıllıon 420 myń teńge qarjy bólingen. Búginde jańa zamanaýı qurylǵylarmen jabdyqtalǵan ambýlatorııada 2 dáriger, 7 medbıke jumys isteıdi.
– Jańa ambýlatorııa aýrýshańdyqty der kezinde anyqtaýǵa múmkindik berip otyr. Máselen, qazir aýylda aýrýshańdyq 9,5 paıyzǵa azaıyp, týý kórsetkishi artty. Endi aýyl turǵyndary em alý úshin aýdan ortalyǵyna barmaıdy. Munda kúndizgi em qabyldaý bólimi de bar,– deıdi Shıeli aýdanynyń bas dárigeri Qazbek Sháýkebaev.
О́tken jyly «Bıdaıkól» aýyldyq mádenıet úıi kúrdeli jóndeýden ótti. 320 kórermen zaly bar óner ordasynda túrli úıirmeler jumys jasaýda.
Aýdanda «Aq bulaq» baǵdarlamasy aıasynda aýqymdy jumystar atqarylýda. Shıeli kentiniń ishki sý qubyrlary jańartylyp, sý kóterý munarasy ornatyldy. Baǵdarlama aıasynda 8 eldi mekenniń aýyz sý júıesin jańǵyrtý jumystary qaralǵan. Búginde bes aýyldaǵy qurylys jumystary aıaqtaldy.
Aýdannyń tynys-tirshiligimen tanysqan Qyrymbek Kósherbaev ortalyq kitaphananyń jumysyn da kózimen kórdi. Kitaphana eski ǵımaratta ornalasqan. Oqyrmandarǵa qyzmet kórsetý sapasyn arttyrý maqsatynda jańa ǵımaratqa kóshirý máselesi qaralatyn boldy.
Erjan BAITILES,
«Egemen Qazaqstan».
Qyzylorda oblysy.