Jaqynda Pavlodar qalasynda taǵy bir qazaq mektebi ashylady. «Dostyq» shaǵyn aýdanynda turǵyzylyp jatqan 1200 oryndyq jańa bilim uıasy ana tilinde oqytady dep sheshildi.
Búginde oblys ortalyǵyndaǵy 43 mekteptiń 10-ny ǵana qazaq mektebi. Kóptegen shaǵyn aýdandaǵy mektepterde oryn jetispeýshiligi saqtalyp otyr.
«Biz jergilikti turǵyndardyń tilekterin eskere otyryp, «Dostyq» shaǵyn aýdanynda salynyp jatqan jańa jaıly mektepte oqytý qazaq tilinde júrgiziletinin habarlaımyz. Qazirgi tańda qarqyndy túrde damyp jatqan «Dostyq» shaǵyn aýdanynda mektep jasyndaǵy 747 bala turady. Olardyń 80 paıyzdan astamy memlekettik tilde bilim alady, biraq kórshi №21 orta mektepte jáne J.Táshenov, B.Momyshuly mektepterinde, Á.Bókeıhan lıseıinde, sondaı-aq shaǵyn aýdannan tys ózge jerlerde oqýǵa májbúr. Jańa «jaıly mektep» bul balalarǵa óz úılerine jaqyn jerde bilim alýǵa múmkindik berip, bolashaqta «Dostyqtyń» jas turǵyndary úshin qolaıly jaǵdaı jasaıdy», dep habarlady qalalyq bilim bóliminiń basshysy Qýanysh Qydyrálın.
Jeltoqsan aıynyń sońyna deıin bul aýmaqta qosymsha 96 páter paıdalanýǵa beriledi. Al kelesi jyly 240 páterden turatyn taǵy úsh turǵyn úı salynady dep kútilýde. Iаǵnı aýmaqta balalardyń sany budan da eselene túsetini anyq. Jańa mektep esebinen kórshiles qazaq synyptary bar mektepterdiń júktemesin azaıtý josparlanyp otyr. Máselen, «Dachnyı» shaǵyn aýdanyndaǵy 1200 orynǵa arnalǵan №21 mektepte qazir 2134 oqýshy bilim alyp júr. «Dostyqtyń» balalary qatynap oqıtyn Kenjekól orta mektebinde 1020 orynnyń ornyna shamamen 1500 oqýshy bilim alady, olardyń 917-si qazaq tilinde oqıdy.
Bilim salasyndaǵy sarapshylardyń boljamyna súıensek, óńir men oblys ortalyǵynda qazaq tilinde oqytýǵa suranys turaqty túrde arta bermek. Keıingi bes jylda eki jańa mektep pen úsh qosymsha ǵımarat salynǵanymen, jańa bilim nysandary bul tapshylyqty tolyq joıa almaǵan. Olardyń ishinde bir mektepte (Á.Bókeıhan atyndaǵy) ǵana bilim memlekettik tilde júrgiziledi. Qaladaǵy 43 mekteptiń 10-y ǵana qazaq tilinde oqytatynyn joǵaryda aıttyq. 2018 jyldan beri Pavlodardaǵy 15 orys tildi mektepte alǵash ret qazaq synyptary ashyldy, biraq bul máseleni sheshýge jetkiliksiz boldy. Sondyqtan ashylǵaly otyrǵan jaıly mektep tek turǵyndardyń suranysyn qanaǵattandyryp qana qoımaı, jas urpaqqa memlekettik tilde bilim alýdy qoljetimdi etýde mańyzdy qadam bolǵaly tur.
Atap óterligi, byltyr oblys boıynsha mektep tabaldyryǵyn attaǵan 23,5 myń oqýshynyń 43 paıyzy qazaq synybyn tańdaǵan. Al bıyl 11 myńǵa jýyq balanyń 45 paıyzynyń tańdaýy qazaq mektepterine túsip otyr. Bul sál de bolsa alǵa jyljýdyń bar ekenin kórsetedi.
О́ńirdiń bilim salasyndaǵy statıstıkalyq derekterine sóz salyp kóreıik. 2024–2025 oqý jylynda Pavlodar oblysynda 360 jalpy bilim mektebi jumys istese, onyń ishinde 137-si – qazaq tilinde oqytatyn mektep (mektepterdiń sany, ara salmaǵy boıynsha 2022 jylǵy statıstıka ózgermegen). Olarda jalpy sany 118 myńǵa jýyq oqýshy oqysa, 50 myńnan astamy nemese 43 paıyzy ǵana qazaq tilinde bilim alady. Negizinen óńirde aralas mektepterge qatysty másele barshylyq. Sebebi 100 paıyz qazaq tilinde bilim beretin mektepterde jańa oqý jylynda 33 myń oqýshy bilim alsa, aralas mektepterdegi qazaq synyptarynda oqıtyn oqýshylar sany – nebári 17,5 myń bala. Al aralas mektepterde oryssha bilim alatyndar sany – 60 myń oqýshy. Iаǵnı aralas mektepterdegi ár úsh synyptyń ekeýi – oryssha. Bul jerde taza oryssha oqytatyn mektepterdi sanatqa qosqan joqpyz. Sondyqtan qazaq mektepteriniń sanyn kóbeıtý – óte quptarlyq qadam. Al jalpy oblystaǵy mektepterde 6 myńnan astam oryn tapshylyǵy bar. Jeti mektepte oqýshylar úsh aýysymda bilim alyp jatyr.
PAVLODAR