Keıingi jyldary memlekettik qyzmetke jumysqa ornalasqan jastardyń qatary kóbeıdi. Buǵan kadrlyq rezervti jasaqtaý yqpal etip otyr.
Máselen, bıyl Atyraý oblysynda kadrlyq rezervke 600-ge jýyq adam qujat tapsyrdy. Irikteýdi Memlekettik qyzmet isteri agenttiginiń Atyraý oblystyq departamenti jergilikti ákimdikpen birlesip júrgizdi. Departament basshysy Nurlan Erkebaevtyń deregine qaraǵanda, arnaıy komıssııa músheleri úmitkerlerdi birneshe sala boıynsha tańdady. Onyń ishinde ındýstrııa, ónerkásip, agroónerkásiptik keshen, jer qatynastary, ekonomıka, qarjy, turǵyn úı-kommýnaldyq sharýashylyq, ınfraqurylym, sıfrlandyrý jáne áleýmettik sala bar. Kadrlyq rezervke joǵary bilimi, keminde 3 jyl jumys ótili bar 35 jastan aspaǵan jastar qatysty.
«О́tinish bildirgenderdiń arasynan 479 adamnyń qujaty qabyldanyp, testileý kezeńine jiberildi. Odan 204 úmitker oń nátıje kórsetip, jeke qasıetin baǵalaý kezeńine ótti. Al quzyretterdi baǵalaýǵa 51 úmitker jiberilgen edi. Alaıda 38 úmitker qurylymdyq suhbatqa bardy. Komıssııa músheleriniń sheshimimen talaptarǵa sáıkes 25 adamdy óńirlik kadr rezervine iriktedi. Kadrlyq rezervtiń músheleri memlekettik ákimshilik laýazymǵa ornalasyp, tıimdi basqarý júıesin qurýǵa múmkindik alady», deıdi N.Erkebaev.
Atyraý oblysy ákimi apparatynyń basshysy Nurlybek Jeńisbekulynyń aıtýynsha, kadr rezervine alynǵan qyzmetkerler endi óz tańdaýy boıynsha usynylǵan laýazymdarǵa konkýrssyz nemese testileýden ótpeı-aq ornalasa alady. Olar aýdandyq jáne oblystyq deńgeıdegi laýazymdarǵa taǵaıyndalyp, ózekti máselelerdi sheshýge atsalysady.
«Kadr rezervine ótken jastar bilimi men tájirıbesiniń nátıjesinde osyndaı jetistikke jetip otyr. Bul – mansaptyq ósýdiń baspaldaǵy. Endi olar ár salada basshylyq laýazymdarǵa taǵaıyndalyp, óńirdiń ózekti máselelerin sheshýge yqpal ete alady. Árıne, bul – jaýapty mindet. Sol sebepten batyl sheshim qabyldaýdy talap etedi. Basty maqsat halyqqa qyzmet etý ekenin esten shyǵarmaý qajet», deıdi N.Jeńisbekuly.
Kadrlyq rezervtegi jastardyń arasynda qyz-kelinshekter bar. Jalpy, Atyraý oblysynyń jergilikti atqarýshy organynda 1 436 memlekettik qyzmetshi jumys isteıdi. Onyń ishinde erlerdiń úlesi – 40 paıyz. Al 60 paıyzy – áıelder. Olardyń 27 paıyzy basshy laýazymdardy atqarady. Jastardyń shoǵyry 35 paıyzdy quraıdy.
«Bul – respýblıkadaǵy jaqsy kórsetkishtiń biri. Qazir memlekettik qyzmettegi jastardyń sanyn ulǵaıtý jáne úlesin arttyrý baǵytynda jumys júrgizilip keledi. Osy oraıda H.Dosmuhamedov atyndaǵy Atyraý memlekettik ýnıversıtetimen birlesken arnaıy memorandým bar. Joǵary oqý ornynda memlekettik qyzmet mektebi ashyldy. Osy bilim ordasynan bilim alǵan 41 túlek memlekettik qyzmette jumys istep júr. Múmkindigi shekteýli azamattarmen tyǵyz baılanys ornatý qolǵa alynady. Osyǵan baılanysty oblys ákimdigi tarapynan atalǵan sanattaǵy turǵyndardy tıisti bos oryndarǵa jumysqa ornalastyrý boıynsha usynystar bar», deıdi N.Erkebaev.
Qazir 18 memlekettik qyzmetshi ıkemdi jumys kestesin paıdalanady eken. Onyń 72 paıyzy – áıelder. Bul olarǵa kásibı mindetterdi jeke ómirimen tıimdi úılestirýge múmkindik beredi. Sondaı-aq memlekettik qyzmette múmkindigi shekteýli azamattar úshin teń eńbek jaǵdaılary men mansaptyq ósý múmkindikteri qarastyrylǵan. О́ńirdegi memlekettik qyzmette 30-ǵa jýyq múmkindigi shekteýli jan jumys isteıdi.
Atyraý oblysy