Qazirgi qoǵamdy ınternetsiz elestetý áste múmkin emes. Eńbektegen baladan eńkeıgen keıýanaǵa deıin ǵalamtordyń qyzyǵyna kirip ketkeni anyq. Alaıda halyqtyń basym bóligi ınternet ıgiligin kórip otyrǵanymen, shalǵaıda ornalasqan biraz eldi meken turǵyndary sapaly baılanysqa zárý ekeni daýsyz. Tipti 2G-ge telmirgen aýyldar da jetip artylady. Sol sanatqa engen eldi mekender Jambyl oblysynda da az emes. Olar jaǵdaı qashan retteledi dep alańdap otyr.
Jyl buryn sıfrlyq damý, ınnovasııalar jáne aeroǵarysh ónerkásibi eks mınıstri Baǵdat Mýsın halyqaralyq zertteýlerge súıene otyryp, bizdiń el ınternet sapasy boıynsha Tokıony basyp ozǵanyn málimdegende, sala mamany túgili, qarapaıym adamdar da kúdik keltirdi. О́ıtkeni jumys saparymen shalǵaı aýdandarǵa barǵanda talaı márte ǵalamtorǵa qol jetkize almaı qanymyz qaınaǵan edi. О́kinishke qaraı, qarasha halyqtyń júıkesine shı júgirtken máseleni sheshý jumystary baıaý iske asyrylyp jatyr.
Jarty jyl buryn óńirde 50 eldi meken turǵyndary 2G qýatyndaǵy ınternetke táýeldi bolsa, jyl sońynda bul kórsetkish 4-ke azaıypty. Oǵan da shúkir deımiz ǵoı. Alaıda bul maqtanýǵa turatyn kórsetkish pe? Jalpy, 2G qýatyndaǵy baılanysty ınternet dep aıtýǵa bola ma, bolmaı ma?
«О́ńirdiń 367 eldi mekeni ınternetpen qamtamasyz etilgen. 46 aýyl (12,5 paıyz) 2G qýatyndaǵy baılanysqa qosylǵan bolsa, 63 eldi meken 3G sanatyndaǵy ınternetti paıdalanyp otyr. Al oblys aýmaǵyndaǵy 258 eldi meken joǵary jyldamdyqty 4G mobıldi ınternet jelisine qosylǵan», deıdi oblystyq sıfrlandyrý jáne arhıvter basqarmasynyń basshysy Rýslan Noqrabekov.
Jalpy alǵanda tutynýshy retinde 2G qýatyndaǵy ınternet pen 3G sanatyndaǵy ǵalamtor arasynda aýyz toltyryp aıtarlyqtaı aıyrmashylyq bar deýge kelmeıdi. Keıbir jerlerde 3G-men ınternetke kirý de mehnatqa aınalatyny belgili. Qysqasy, ekeýin qosa eseptegendegi kórsetkish 29,7 paıyzdy quraıdy eken. Al joǵary jyldamdyqty 4G mobıldi baılanysy óńir boıynsha 70,3 paıyzǵa teń.
«О́ńir boıynsha 199 eldi meken talshyqty-optıkalyq baılanys jelisimen qamtylǵan bolsa, 172 eldi meken qamtamasyz etilmegen. «Qoljetimdi ınternet» ulttyq jobasy aıasynda 2023–2027 jyldary óńir eldi mekenderiniń qoljetimdi ınternet jelisine jáne baılanysqa qoljetimdiligin qamtamasyz etý jónindegi jol kartasyna sáıkes 2025–2027 jyldary 198 aýyldaǵy mobıldi ınternet jelisiniń sapasyn 4G-ge arttyrý kózdelgen.
Sondaı-aq 28 eldi mekendi jergilikti atqarýshy organ tarapynan elektr jelileri men antenna-dińgek qurylysymen qamtamasyz etý boıynsha jumys atqarylady. Sonymen qatar 170 eldi mekendi talshyqty-optıkalyq baılanys jelisimen jáne respýblıkalyq, oblystyq mańyzdaǵy joldardy sıfrlyq ınfraqurylymmen qamtamasyz etý úshin 2024–2025 jyldary 12 antenna dińgek ornatý kózdelgen», deıdi jaýapty basqarma basshysy.
Basqarma basshysy keltirgen derekke júginsek, óńirdegi eldi mekenderdi 100 paıyz 4G sanatyndaǵy ǵalamtormen jáne talshyqty-optıkalyq baılanys jelisimen qamtamasyz etý jumystary 2027 jyly máresine jetetin kórinedi.
Aıshylyq alys jerlerden jyldam habar alǵyzatyn sapaly ınternetke zárý aýyldar elimiz boıynsha da az emes. Jarty jyl buryn Úkimet otyrysynda sóz alǵan Sıfrlyq damý, ınnovasııalar jáne aeroǵarysh ónerkásibi mınıstri Jasulan Mádıev atqarylyp jatqan jumystar jaıynda esep bergen kezde ózekti máselege qatysty óz oıymen bólisip, jaǵdaıdy baıandaǵany bar.
Mınıstr keltirgen málimetke súıensek, jarty jyl buryn elimiz boıynsha mobıldi ınternetke qol jetkize almaı otyrǵan 1 424 aýyl anyqtalǵan. Árıne, odan beri birshama ýaqyt ótti. Kórsetkish shamaly bolsa da azaıǵan bolar. Kim bilsin...
«Aıta-aıta Altaıdy, Jamal apa qartaıdy» demekshi, eldi mekenderdi sapaly ınternetpen qamtamasyz etý jumystary jyl saıyn toqtaýsyz júrgizilgenine qaramastan, kórsetkish kóńil kónshiter emes. О́ńirde 2 G qýatyndaǵy baılanysqa telmirgen 46 aýyl bar. Al jaýapty basqarma basshysy oblys aýmaǵyndaǵy eldi mekenderdi 100 paıyz sapaly ǵalamtormen qamtasyz etý tek 2027 jyly múmkin bolatynyn aıtyp otyr. Soǵan qaraǵanda qarasha halyq taǵy da úsh jyl shydaýy kerek. Tek shydamnyń shegi úzilmese bolǵany...
Jambyl oblysy