Taıaýda Kıevte Ýkraınany qoldaý jóninde halyqaralyq konferensııa ótti.
Onda qazaqstandyq delegasııany Ekonomıkalyq ıntegrasııa isteri mınıstri Janar Aıtjanova basqardy. Ol ortaq sessııada sóılegen sózinde «Qazaqstan Respýblıkasy jáne Ýkraına arasyndaǵy ekijaqty qatynastar dástúrli dostas jáne ózara qurmetpen, izgi nıettiligimen erekshelenedi. Eki el arasyndaǵy yqpaldastyqtyń nyǵaıýy men damýyna prezıdentter Nursultan Nazarbaev jáne Petr Poroshenko kezdesýleri men kelissózderi zor yqpal etti. 2014 jyly 22 jeltoqsanda Kıevke saparynyń nátıjeleri boıynsha, Elbasy ýkraınalyq tarappen saýda-ekonomıkalyq yqpaldastyqty belsendirý mindetin qoıdy. Sol sebepti búgin biz Qazaqstan-Ýkraına Ekonomıkalyq yntymaqtastyǵy jónindegi memleketaralyq komıssııa sheńberinde jobalardy júzege asyrýǵa nıettimiz. MAK otyrystary barysynda 2015-2016 jyldarǵa Qazaqstan-Ýkraına is-qımyldar josparynyń jobasyn talqylaý kózdelgen, onda eki el arasynda otyn-energetıkalyq, agroónerkásiptik keshenderde, kólik, ǵylym, bilim jáne basqa salalarda yntymaqtastyqtyń negizgi baǵyttary qarastyrylǵan», dedi.
Ýkraınada qalyptasqan jaǵdaıǵa baılanysty Qazaqstan gýmanıtarlyq kómek kórsetýge ýáde berip, aıtqan sózinde turdy. Bıylǵy 10 qańtarda Severodonesk qalasynda qazaqstandyq gýmanıtarlyq kómek ýkraınalyq tarapqa 70 mln. teńgege azyq-túlik túrinde tabystalǵan bolatyn. Sonymen qatar, Ýkraına ońtústik-shyǵys óńiriniń gýmanıtarlyq qajettilikterine Halyqaralyq qyzyl krest komıteti arqyly 30 000 AQSh dollary shamasynda qarjylyq kómek jiberildi. Qazirgi ýaqytta gýmanıtarlyq kómektiń jańa jobasyn jasaǵaly jatyrmyz. Qazaqstan Úkimeti «Ýkrytıe» Chernobyl qoryna qarjylaı qoldaý kórsetýge jáne Chernobyl atom elektr stansasyndaǵy halyqaralyq jobalardyń tolyq aıaqtalýyna mıllıon eýro somasynda úlesin berýge sheshim qabyldady, dedi J.Aıtjanova.