Aqmola oblysy ákiminiń 2024 jylǵy 9 jeltoqsandaǵy ókimimen, QR Prezıdenti Ákimshiliginiń jáne aýdandyq máslıhat depýtattarynyń kelisimimen Arshaly aýdanynyń ákimi bolyp Dostanbek Esjanov taǵaıyndaldy. Buǵan deıin ol Birjan sal aýdanynyń ákimi qyzmetin atqarǵan, dep habarlaıdy Egemen.kz oblys ákimdiginiń baspasóz qyzmetine silteme jasap.
Aýdannyń jańa ákimin óńir basshysy Marat Ahmetjanov tanystyryp, oǵan Prezıdenttiń «Ádil Qazaqstan: Zań jáne tártip, ekonomıkalyq ósý, qoǵamdyq optımızm» Joldaýynyń basymdyqtaryn eskere otyryp, birqatar mindetter qoıdy.
«Sizdiń basty mindetińiz – aýdan turǵyndarynyń ómir súrýine qolaıly jaǵdaı jasaý, jylytý maýsymynyń aqaýsyz ótýin qamtamasyz etý, aýdannyń elektrmen jabdyqtaý tapshylyǵyn azaıtý máselesin sheshý úshin josparlanǵan jobalardy iske asyrý, eldi mekenderdi úzdiksiz ári sapaly aýyz sýmen qamtamasyz etý jáne jol jelisin damytý máseleleri boıynsha jumystardy jandandyrý», dedi Marat Ahmetjanov.
Sondaı-aq, aýdan basshylyǵy jańa ınvestısııalyq jobalardy pysyqtaýy, ınvestorlardy tartý boıynsha jumysty ilgeriletýi, jumys istep turǵan AО́K kásiporyndarynyń júktemesin arttyrýy, Astana aglomerasııasyn damytýdyń Keshendi josparyna engizilgen jobalardy turaqty baqylaýda ustaýy qajet.
«Problemalyq máselelerdi sheshý jáne jańa jobalardy iske asyrý boıynsha úlken jumys kútip tur. Sondyqtan sizge jedel sheshim qabyldaý ǵana emes, eń bastysy, olardyń barlyǵyn tıimdi iske asyrý kerek», dedi oblys ákimi.
Kezdesý sońynda Marat Ahmetjanov Dostanbek Esjanovqa aýdan turǵyndarynyń ıgiligi úshin júktelgen barlyq mindetterdi iske asyrýda tabys tiledi.