Minezben dáleldengen myqtylyq

Negizi osy jarystyń basty jekpe-jeginde Shavkat Rahmonov Muhammad Belalmen jarty­laı orta salmaqtyń chempıon­dyq táji úshin aıqasýǵa tıis edi. Alaıda AQSh sportshysy densaýlyǵynyń syr bergenin alǵa tartyp, oktagonǵa shyǵýdan bas tartty. Onsyz da biraz ýaqyt jankúıerler nazarynan tys qalǵan qandasymyzǵa dereý arada qarsylas tabý qajet boldy. UFC basshylary biraz myqtyǵa usynys jasap kórgen edi, olar kelispedi. Bas tartqandardyń qatarynda Kolbı Kovıngton, Kamarý Ýsman syndy ataqtary alysqa jaıyl­ǵan apaıtóster de bar. Sol «yǵaı men syǵaılar» arasynan tek Ien Gerrı esimdi faıter ǵana qazaqtyń qaısar ulymen aıqasýǵa óz kelisimin berdi. 

27 jastaǵy Irlandııanyń óki­li de «kólde­neń kók attylardyń» biri emes. Sporttyń osy túrindegi mansabyn osydan bes jyl bu­ryn bastaǵan Ien sol ýaqyt ara­lyǵynda 15 kezdesý ótkizip, bar­lyǵynda jeńiske jetti. Sonyń segizinde qarsylastaryn nokaýt­­­qa jiberse, bireýinde «qylqyn­dy­rý» tásilin qoldandy. Taǵy jeti básekeniń sheshimin tóreshiler shyǵardy.

Buǵan deıingi qarsylastarynan jeńilmegen qos sańlaqtyń joly jeksenbi kúni Las-Vegas­ta qıysty. Gerrı Shavkatpen qaımyqpaı aı­qas­ty. Báseke bastalǵan bette qandasy­myz kúres­tiń ádisine salýǵa umtyldy. Ony jy­ǵyp alyp, biraz «ýmajdaǵysy» keldi. Biraq qarsylasy Rahmonovtyń yrqyna kónbedi. Ol grepplıng tásilderinen saýatty qorǵanyp, árbir qaýiptiń betin ońaı qaıtaryp otyrdy. Al soqqylardyń dáldigi jaǵynan basymdyq «Nomad» jaǵynda bolǵany sózsiz. Bir mezette oń qolmen qulaq shekeden soǵyp, birde aınalyp (bekfıst) uryp Iendi táltirektetip jiberdi.

Besinshi raýndta Rahmonov qıyn jaǵdaıǵa tap boldy. Sol kezde barsha jankúıer­diń júregi aýzyna tyǵyldy. Ekeýi alysyp jatqanda ırlandııalyq ebin taýyp, qazaq­ty jyǵyp aldy da, týsyrtyna shyqty. Gerrı Shavkatty qos qolymen moınynan myqtap ustap, «qylqyndyrý» ádisin qoldanýǵa talpyndy. Alaıda bul kórinis uzaqqa sozylmady. Shavkat bul qaýipten qutyldy.

Báseke aıaqtalǵannan soń, barlyq tóre­shi Shavkat Rahmo­nov­tyń myqtylyǵyn bir­aýyz­dan moıyndady. Sóıtip, ol ok­ta­gon­daǵy 19 jeńisine qol jet­kiz­di. Bir ókinishtisi, «Nomad» óz ­ka­rerasynda tuńǵysh ret báse­keni merziminen buryn aıaqtaı almady. Desek te bul «Shav­kat osaldyq tanytty» degen sóz ­emes. Kerisinshe, qarsylasy óte jaq­sy da­ıyndyqpen kelgen eken. Oǵan tipten UFC-diń kezindegi chempıony Charlz Olıveıra­nyń ózi sekýndant boldy. Biraq báribir qazaqqa áli jetpedi. Osylaısha, kúlli Irlandııa úmit artqan arlan alǵash ret jeńilistiń kermek dámin tatty.