Elimizde qurylys jumystarynyń kólemi 11 aıda 10,3%-ǵa ósti

Mınıstrdiń aıtýynsha, bıylǵy 11 aıda qurylys jumystarynyń kólemi 6,9 trln teńgege jetkizilgen, bul ótken jylmen salystyrǵanda 10,3%-ǵa artyq. 2024 jyldyń sońyna deıin rekordtyq 18 mln sharshy metr turǵyn úı paıdalanýǵa beriledi dep josparlanǵan. Qarasha aıynyń qorytyndysy boıynsha 16,3 mln sharshy metr tapsyrylǵan, jyl sońyna deıin taǵy 1,7 mln sharshy metr paıdalanýǵa berý júrgizilip jatyr. «Salaǵa qarajatty ınvestısııalaýdyń joǵary kórsetkishterine qol jetkizý úshin Mınıstrlik turǵyn úı qurylysyn yntalandyrý boıynsha buryn-sońdy bolmaǵan sharalar qabyldady. Osy jyly barlyq kózder esebinen atalǵan maqsattarǵa shamamen 965 mlrd teńge josparlanǵan, bul 160 myńnan astam azamattyń 41 myń jańa páterge qonystanýyn qamtamasyz etedi. Muqtaj azamattarǵa qoljetimdi quraldardy usynýǵa erekshe kóńil bólinedi», dedi Qanat Sharlapaev.

Sonymen qatar, bıyl memlekettik qoldaý esebinen 22 myńnan astam jalǵa beriletin páter satyp alýǵa 330 mlrd teńge qarastyrylyp, ákimdikterge 305 mlrd teńge aýdarylǵan. Jyl sońyna deıin memlekettik baǵaly qaǵazdar shyǵarý esebinen 165 mlrd teńge somasynda 10 myńnan astam páterdi paıdalanýǵa berý josparlanǵan. 2% jáne 5% boıynsha jeńildetilgen ıpotekalyq qaryzdar esebinen búgingi kúni 94,5 mlrd teńge somasyna 7 861 qaryz berilgen. Turǵyn úı qurylysy aýdandaryna ınjenerlik jelilerdi tartýǵa 83 mlrd teńge bólingen.

Aıta keteıik, osy jyldyń mamyr aıynan bastap «Naýryz» jańa turǵyn úı baǵdarlamasy iske qosyldy. 2024 jylǵa 300 mlrd teńge somasyna 12 myń qaryz berý josparlanǵan. Búgingi tańda 172 mlrd teńgege 6 myńnan asa qaryz berilgeni habarlandy.