Semeıde «Birge! Bir tolqynda» dástúrli jastar forýmy ótti. Bul forým aımaqtaǵy jastar uıymdarynyń kóshbasshylary men eriktilerin, belsendiler men óńirdegi stýdentter klýbtarynyń músheleriniń basyn biriktirdi. Is-sharaǵa qatysqan oblys ákimi Nurlan Uranhaev jastar bolashaqtyń qozǵaýshy kúshi ekenin jáne olarǵa qurmet kórsetý, shabyttandyrý qajet ekenin aıtty.
Jastar el bolashaǵy bolǵandyqtan olardyń osy bastan qoǵamnyń qozǵaýshy kúshi retinde biregeı bastamalardyń basy-qasynan tabylýy kóńil qýantady. Búginde oblys jastary jańa ıdeıalardy alǵa tartyp, júzege asyrýǵa batyldyq tanytyp keledi. О́ńirdiń qoǵamdyq ómirine óń berip, bilim men ǵylym, óner men sport, volonterlik qyzmet pen kásipkerlik salalarda eńbek etip, jetistikke jetken zamandastar jeterlik. Forým uıymdastyrýdaǵy basty mindet – oblystyń damýyna úles qosqan jastardyń isin úlgi etip kórsetý.
Bıyl óz salasyn órge súırep jastardyń arasynda úzdikterdi anyqtaý 7 atalym boıynsha júzege asty. Baıqaýǵa 80-ge jýyq úmitker óz qujattaryn tapsyryp, baq synaǵan. Jeńiske jetken jastarǵa oblys ákiminiń alǵyshaty men estelik syılyqtar jáne aqshalaı sertıfıkattar tabys etildi.
Qazylar alqasynyń sheshimimen «Jyl kóshbasshysy» bolyp Erasyl О́mirálinov tanyldy. Sondaı-aq «Jyldyń jas daryny» Erqanat Sadýhanov pen Muhtar Qaısar ataldy. «Úzdik jastar resýrstyq ortalyǵy» atalymyn Aıagóz aýdany men Kýrchatov qalasyndaǵy jastardy bir ortaǵa toǵystyryp qyzmet atqarǵan mekemeler ıelendi.
«Soul Voice» jobasynyń avtory Erasyl Taev «Jyldyń úzdik jobasy», Eldos Seıitbekov «Jyldyń jas eńbek adamy», Nargız Súleımenova men Aıan Máýlethanov «Jyldyń jas volonteri», Saǵynbaevtar otbasy «Jyldyń jas otbasy» atalymymen marapattaldy.
Semeı