Memleket basshysy Qasym-Jomart Toqaev halyqqa arnaǵan Joldaýynda úı kezeginde turǵan áleýmettik osal toptaǵy azamattardyń baspana máselesin sheshýdi Úkimetke tapsyrǵan edi. Sol tapsyrma negizinde jer-jerlerde muqtaj jandarǵa úı, páterlerdiń kilti tabystalyp jatyr. Jaqynda Aqsý-Aıýly aýylyndaǵy 60 otbasy baspanaly boldy.
Bıyl Shet aýdanynda turǵyn úı qurylysy qarqyndy júrdi, aýdan ortalyǵynyń irgesinen jańa shaǵyn aýdan boı kóterdi. Sonyń nátıjesinde 60 otbasy jańa baspanaǵa qol jetkizdi. Onyń ishinde bir bóligi taýnhaýs turǵyny bolyp shyǵa keldi. Bıýdjet qarjysyna salynǵan 24 páterli kópqabatty turǵyn úı men 36 páterli taýnhaýs kilti ıelerine saltanatty jaǵdaıda tabys etildi. Aýdan ákimi Muhıt Muhtarov qýanysh ıelerin qonystoıymen arnaıy quttyqtady.
– Árbir turǵynnyń basty máselesi – baspanaly bolý. El Prezıdenti osyǵan erekshe nazar aýdaryp, Úkimetke naqty tapsyrma júktedi. Tapsyrma negizinde, oblys ákimdiginiń qoldaýymen aýdanymyzda jańa turǵyn úıler qurylysy josparǵa sáıkes, júıeli júrgizilip keledi. Aldaǵy ýaqytta Aqadyr kentinde 42 páter, Aqjal kentinde 8 páter paıdalanylýǵa beriledi. Táýelsizdik kúnine oraı taǵy da kezekte turǵandarǵa úıdiń kiltin tabystaımyz, – dedi Muhıt Saılaýuly.
Munymen qosa, aýdandaǵy tórt birdeı eldi mekende áleýmettik osal toptar men kópbalaly otbasy sanatynda turǵandardy turǵyn úımen qamtamasyz etý maqsatynda respýblıkalyq «Samuryq Qazyna» AQ-nan birinshi naryqtaǵy jalpy sany 170 taýnhaýs jáne jer úıler satyp alýǵa qarajat bólingen, bul baǵyttaǵy jumystar da qalypty júrgizilip jatyr.
О́z kezeginde memlekettik baǵdarlamamen baspanaly bolǵandar aýdan ákimdigine rızashylyǵyn bildirdi. Jalǵyzbasty ana Alma Tájibaevanyń úı kezeginde turǵanyna 15 jyl bolǵan eken, endi taýnhaýstyń turǵyny. О́z úıi apatty jaǵdaıda bolǵan soń jergilikti ákimdik aldymen ýaqytsha turýǵa úı berdi. Endi, mine, úsh bólmeli úıge qol jetkizip otyr.
Nurgúl Ibrahımovanyń da úı kezegine tirkelgenine 10 jyldaı ýaqyt bolypty. «Sabyr túbi – sary altyn», dep kútip júrdim. Eki bólmeli úıdiń kiltin alyp, qýanyshqa kenelip qaldyq. Endi biz jańa shaǵyn aýdannyń turǵynymyz», dedi Nurgúl.
Erli-zaıypty Erlan-Gúlden Mustafınder de óz shańyraǵyn uzaq kútkenderdiń biri. Olar «qonystoıdy qys boıy atap ótetin boldyq», deıdi mereılenip.
Aqsý-Aıýlynyń irgesinen boı kótergen jańa shaǵyn aýdan turǵyndarynyń armany oryndalyp, shańyraq shattyǵyn toılaýǵa kún kezegine turyp jatyr. О́ıtkeni qudaıy kórshi bolǵan olar qazaq saltymen bir-birine erýlik berýge qyzý kirisip ketti.
Qaraǵandy oblysy,
Shet aýdany,
Aqsý-Aıýly aýyly