«EKSPO» halyqaralyq kórme ortalyǵynda «Kaztraffic-2024» kórmesi ótti. Oǵan AQSh, Eýroodaq, Reseı, Qytaı, О́zbekstan jáne basqa elderdiń 100-den astam jetekshi kompanııasy qatysyp, sońǵy úlgidegi jetistikterin usyndy.
Kórme aıasynda jańa ónimder – jol qurylysy tehnıkasy, jabdyqtar men aspaptar kópshilikke tanystyryldy. Olar taıaý bolashaqta jol qurylysy men kólik ınfraqurylymynyń qurylysy týraly ádettegi uǵymdardy ózgertpek.
«Jol salasyn odan ári damytý boıynsha birqatar mindet tur. Atap aıtqanda, joldyń paıdalaný jaǵdaıyn qamtamasyz etip, sapasyn arttyrý kerek. Sondaı-aq zamanaýı jol ınfraqurylymyn quryp, ondaǵy qaýipsizdikti tıimdi basqarýdy qamtamasyz etý mańyzdy. Jazǵy jáne qysqy joldardy kútip ustaýdyń qajetti deńgeıin qalypty ustaý da ózekti», dedi Kólik mınıstri Marat Qarabaev.
Bıyl elimizde 12 myń shaqyrym jol jóndeý jumysymen qamtylǵan. Qaraǵandy – Almaty, Taldyqorǵan – О́skemen, Aqtóbe – Qandyaǵash, Atyraý – Astrahan sııaqty jalpy uzyndyǵy 2 myń shaqyrym bolatyn 4 iri jol jobasyn qaıta jańǵyrtý jumysy aıaqtalyp jatyr.
«Iri jobalardyń aıaqtalýyna baılanysty eldiń tranzıttik áleýetin odan ári jaqsartýǵa qatysty jańa joba daıyndaý jumysy bastaldy. 2029 jylǵa qaraı uzyndyǵy 4 500 km quraıtyn 12 jobany júzege asyrý josparlandy. Qazir jobalyq qujat daıyndalyp, qarjy kózderi men olardy tartý tetikteri pysyqtaldy. Sońǵy jobalardy iske asyrý tájirıbesin eskerip, merdiger men jobalaýshy jaýapkershiligin arttyrý maqsatynda halyqaralyq qarjy ınstıtýty qoldaýymen bul jobalarǵa EPCM kelisimsharttary men FIDIC qaǵıdattary engizildi», dedi M.Qarabaev.
Kórmege «Q Smart-PM» asfaltynyń turaqtylyǵyn arttyrýǵa arnalǵan modıfıkator, «Q Smart-P» beton joldarynyń beriktigin nyǵaıtatyn qospa, topyraqty nyqtap, nyǵyzdaýǵa qoldanatyn «Q Smart-S» materıaly qoıyldy. Al kóktaıǵaqqa qarsy «Q SmartAntiGlaze» ekoreagenti men «Q Smart» jeke brendi, sondaı-aq QazjolǴZI-dyń birqatar ázirlemesi jan-jaqty tanystyryldy.
«2024 jyl ınstıtýt tarıhyndaǵy mańyzdy kezeń boldy. 65 jyldyq – jaı ǵana ataýly kún emes, kópjyldyq eńbek pen jetistikterdiń kórsetkishi. Ondaǵan jyl boıy joǵary kásipqoılyqty, iske degen adaldyq pen damýǵa umtylyp kele jatqan ujymdy maqtan tutamyz», dedi «QazjolǴZI» AQ basshysy Arman Álibaeva.
Búginde ınstıtýt avtomobıl joldaryn dıagnostıkalaý, materıaldar sapasyn baǵalaý men jobany ǵylymı súıemeldeýge arnalǵan jabdyqtarmen tolyq qamtamasyz etilgen. Ujymda ǵylym doktorlary men kandıdattar, sondaı-aq jas mamandar bar. QazjolǴZI halyqaralyq ónertabystarǵa 19 patent aldy. Bul onyń ǵylymı ázirlemeler jasaý barysyndaǵy kóshbasshy ekenin rastaıdy.
QazjolǴZI jol salasy úshin birqatar mańyzdy jáne biregeı sıfrlyq ónim jasady. Onyń qatarynda kóshe-jol jelisi men SÝEM kópirlerdi paıdalanýdy basqarý júıesin, jol-qurylys materıaldary men jańa tehnologııalardyń biryńǵaı bazasyn, «Jolshy» sıfrlyq bazasyn, ashyqtyqty qamtamasyz etýge yqpal etetin «Jollab» zerthanasyna arnalǵan elektrondyq platforma bar.
«Kaztraffic-2024» kórmesi ǵylymı-tehnıkalyq baǵyt, IT-ındýstrııa, avıasııa, agrarlyq sektor, ónerkásiptik óndiristiń barlyq túri, óndirýshi keshen, qurylys pen turǵyn úı-kommýnaldyq sharýashylyq ókiliniń maqsaty men múddesin biriktirdi. Árbir kelýshi ekspozısııalarymen jeke tanysýǵa, salanyń álemdik kóshbasshylarynyń ókilderimen tikeleı sóılesýge múmkindik aldy.