Aýyl turǵyndarynyń turmys-tirshiliginiń jaqsarýyna tilekshi ári qamqorshy azamattardyń bataly bastamalary keń etek alyp, ózgelerge úlgi bolsa quba-qup. Táýelsizdik kúni qarsańynda «Amanat» partııasynyń múshesi Jambyl aýdanyndaǵy 5 otbasyna baspana kiltin tabys etip, júrekjardy qýanyshqa keneltti.
Igi isti «Amanat» partııasynyń belsendi múshesi, «Aqterek» sharýa qojalyǵynyń tóraǵasy Temirlan Shaınúsipov júzege asyrdy. Isker azamat buǵan deıin 160 otbasyna úı salyp bergen eken.
Aqterek aýylynda ótken saltanatty kilt tabystaý rásiminde Jambyl aýdanynyń ákimi Nurlan Ertas turǵyndardy quttyqtap, mundaı ıgi bastamalar aýyldardyń áleýmettik-ekonomıkalyq damýyna zor yqpal etetinin atap ótti.
«Temirlan Shaınúsipov aǵamyzdyń qaıyrymdylyǵymen búgin 4 bólmeli 5 páterdiń kilti tabystaldy. Ol osy ýaqytqa deıin 160-tan astam úı salyp, aýyldastarynyń jaǵdaıyn jaqsartty. Áleýmettik máselelerdi sheshý jolyndaǵy osyndaı bastamalar tek qana aýyldyq jerlerdiń damýyna emes, tutas eldiń órkendeýine úles qosady. Aǵamyzdyń qaıyrymdylyǵy men týǵan jerine degen súıispenshiligi – barshamyzǵa úlgi. Búgin kilt alǵan otbasylardy qýanyshtarymen quttyqtaımyn. Bul úıler sizderge tek baspana ǵana emes, jańa ómirdiń bastamasy bolsyn», dedi aýdan ákimi.
Jańa úıler kópbalaly otbasylar men aýyl sharýashylyǵynda uzaq jyl boıy eńbek etken azamattarǵa tabystaldy. Olardyń arasynda 40 jyl júrgizýshi bolyp eńbek etken zeınetker Murathan Rahmetqojaev pen usta bolyp jumys istegen Muhtar Toqseıitov te bar.
«Meniń ómirimde mundaı qýanysh alǵash ret bolyp tur. Osy úıdi syıǵa tartqan Temirlan Shaınúsipovke alǵysym sheksiz. Biz sııaqty qalypty eńbek etken jandardy umytpaı, osyndaı qoldaý kórsetkenine shyn júrekten rızamyn», dedi Murathan Rahmetqojaev.
Sonymen qatar jas mehanızator, tórt balanyń ákesi Medet Qypshaqbaev, bes balany tárbıelep otyrǵan kópbalaly otbasynyń otaǵasy Erlan Badambekov, tórt balanyń ákesi, «Nurmuhammetálı» sharýa qojalyǵynyń jumysshysy Qanat Ábdibaev jańa qonysqa ıe boldy.
Aqterektik turǵyndardyń qýanyshy munymen ǵana shektelgen joq. «Amanat» partııasynyń saılaýaldy baǵdarlamasy aıasynda 4 myńǵa jýyq turǵyny bar bul aýylǵa gaz qubyry tartylyp, iske qosyldy. Aýdan ákimi Nurlan Ertas pen «Amanat» partııasy Almaty oblystyq fılıalynyń atqarýshy hatshysy Erlan Jaqypov gaz qubyrynyń iske qosylýymen turǵyndardy quttyqtady.
Bıyl aýdandaǵy eldi mekenderdi gazdandyrýǵa bıýdjetten 6,2 mlrd teńge bólingen. Sonyń ishinde Aqterek aýylyn gazdandyrýǵa arnalǵan jobanyń quny 1 mlrd 82 mln teńgeni quraıdy. Jobany júzege asyrýshy merdiger – «Kompanııa GazQurylys» JShS.
«Aýyldaǵy 37 úıge gaz qosylǵan. Aldaǵy ýaqytta bul jumystar jalǵasyp, aýyldyń qalǵan úılerin de kógildir otynmen qamtamasyz etý josparlanyp otyr. Onyń kelýi tek turǵyndardyń turmysyn jaqsartyp qana qoımaı, aýyldaǵy mańyzdy áleýmettik nysandardyń jumysyna da oń yqpal etedi. Mektepter, dárigerlik ambýlatorııa, balabaqshalar, meshit, sharýa qojalyqtarynyń qyzmet kórsetý sapasy aıtarlyqtaı artady. Bul óz kezeginde aýyldyń áleýmettik-ekonomıkalyq damýyna tyń serpin beredi», dep atap ótti aýdan ákimi.
Sondaı-aq «Amanat» partııasynyń Jol kartasyna sáıkes 2027 jylǵa deıin óńirdiń gazdandyrý deńgeıin 70%-ǵa jetkizý kózdelip otyr. Aıta ketý kerek, búgingi tańda oblysta 1,18 mln adam gazǵa qol jetkizgen.
«Aýdanda sheshilýge tıis máselelerdi turǵyndarmen birlesip talqylap, olardyń usynys-tilekterin jınadyq. Sonyń biri – eldi mekenderdi gazdandyrý máselesi. «Amanat» partııasynyń saılaýaldy baǵdarlamasy aıasynda búgin Aqterek aýylyna gaz berilip, turǵyndardyń kópten kútken armany oryndaldy. Bul jumys munymen toqtamaıdy. Aldaǵy ýaqytta basqa aýyldarǵa da gaz qubyryn tartý jumystary jalǵasyn taýyp, oblystyń gazdandyrý deńgeıi 70 paıyzǵa deıin artady», – dedi E.Jaqypov.
Almaty oblysy