Ulttyq mýzeıde kórnekti tulǵa, Alash qaıratkeri Sháımerden Qosshyǵululynyń týǵanyna 150 jyl tolýyna oraı «Ult qaıratkeri Sháımerden Qosshyǵululy» atty dóńgelek ústel ótti. Alash arysynyń qoǵamdyq-saıası qyzmetin nasıhattaý, óskeleń urpaqty otansúıgishtik pen adamgershilikke tárbıeleýdi maqsat tutqan alqaly jıynǵa alashtanýshy ǵalymdar men tarıhshylar, belgili qoǵam qaıratkerleri, tulǵanyń urpaqtary, sonymen qatar joǵary oqý oryndarynyń stýdentteri qatysty.
Sháımerden Qosshyǵululy – qoǵam qaıratkeri, qazaq zııaly qaýym ókilderiniń biri, qazaq halqynyń quqyn qorǵaǵan tulǵa. 1906 jyly qańtarda Sh.Qosshyǵululy Búkilreseılik musylmandardyń II sezine delegat bolyp saılandy. 1906 jyly Tómengi Novgorod qalasynda ótken III Búkilreseılik musylmandar sezine qatysyp, saıası salaǵa, oqýǵa, dinge qatysty buıryqtardy shyǵarýǵa atsalysty. 1906-1907 jyldary Aqmola oblysynan I jáne II Memlekettik Dýmalardyń depýtaty bolyp saılandy. 1907 jyly Peterborda shyǵatyn «Serke» gazetine qarjylaı kómek kórsetti. Oqý-aǵartý isimen aınalysyp, balalardy oqytty. 1931 jyly keńes ókimeti tarapynan tutqyndalyp, jer aýdaryldy. KSRO Joǵarǵy Keńesi prezıdıýmynyń 1989 jylǵy 16 qańtardaǵy Jarlyǵy negizinde 1989 jylǵy 19 qyrkúıekte Kókshetaý oblystyq prokýratýrasy aqtap aldy. 2015 jyly Úkimettiń sheshimimen Astana qalasyndaǵy 188-kóshesiniń ataýy ózgertilip, Sháımerden Qosshyǵululynyń esimi berildi.
Muhamedjan Seralın «Serke» gazetiniń tarıhyna arnalǵan maqalasynda: «1907 jyly Sankt-Peterbýrgte II Memlekettik Dýmanyń múshesi Shahmerden Qosshyǵulovtyń bastamasymen «Serke» gazeti shyǵaryla bastady. Biraq gazetti birden memlekettik organdar jaýyp tastady» dep jazdy. Qalamgerdiń keltirgen deregine súıensek, gazet shyqqannan keıin redaksııada polısııa paıda bolady. Olar redaksııanyń búkil bólmelerinde tintý jasaıdy. Buǵan Mirjaqyp Dýlatulynyń úkimet saıasatyna qarsy maqalasy sebep boldy degen derekterdi de qosa keltiredi.
Tulǵa taǵylymyn zerdelýge baǵyttalǵan dóńgelek ústelde Sháımerden Qosshyǵululynyń qoǵamdyq-saıası qyzmeti, ásirese Reseı ımperııasynyń Memlekettik Dýmasynyń I jáne II shaqyrylymdaǵy jumysyna qatysty máseleler qarastyryldy. Sonymen qatar aıtýly jıynda qaıratker tulǵanyń kitaptary men sırek sýretteri mýzeı qoryna tabys etildi.
Dóńgelek ústelge qatysqan Serik Negımov, О́mirzaq Ozǵanbaev bastaǵan zertteýshi ǵalymdar, qoǵam qaıratkerleri Sháımerden Qosshyǵulynyń tulǵalyq, qaıratkerlik qyryna jan-jaqty toqtalyp, ult muraty jolynda sińirgen eńbegin keńinen sóz etti. Sondaı-aq ult qaıratkeriniń eldik murat jolyndaǵy eleýli isterin, taǵylymdy ónegesin aldaǵy ýaqytta da jandandyryp, jańǵyrtý kerek ekenin, Sh.Qosshyǵululynyń rýhanı murasy bolashaqta keleli zertteýdi qajet etip turǵan mańyzdy másele ekendigin de basa aıtty.