Býrabaıdyń ásem tabıǵatynyń aıasynda ornalasqan “Baıbýra” qonaq úı kesheninde buqaralyq aqparat quraldary úshin astanalyq jýrnalısterdiń “TANAT” klýby men “MEDIALIFE” qoǵamdyq qory “BAQ-tarda demokratııalyq úderisterdi jarııa etýdiń halyqaralyq jáne ulttyq tájirıbesi” atty respýblıkalyq semınar-trenıng uıymdastyrdy.
Jýrnalıster kúni qarsańynda ári “Qazaqstan – 2010 jyly EQYU tóraǵasy” baıqaýy sheńberindegi sharanyń ótýine Syrtqy ister mınıstrligi, EQYU-nyń Astanadaǵy ortalyǵy jáne F.Ebert qory ókildigi muryndyq boldy. “MEDIALIFE” qoǵamdyq qorynyń prezıdenti Olga Volkova, Syrtqy ister mınıstrliginiń Halyqaralyq aqparat komıtetiniń tóraǵasy Roman Vasılenko, EQYU-nyń Astanadaǵy ortalyǵynyń basshysy, elshi Aleksandr Kelchevskıı, Lıtva elshiliginiń Astanadaǵy bóliminiń bastyǵy Antanas Pıatraýskas jáne basqalar birqatar qundy oılaryn ortaǵa saldy.
Sondaı-aq semınar-trenıng barysynda sóz bostandyǵynyń ólshemi, fakt men pikirdiń arasalmaǵy qanshalyqty degen turǵyda pikirtalastar bolyp ótti. Mysaly, “Jaraısyń, aılaker!”, “Qyraǵy kóz myrza” jáne sol sııaqty sózderdiń adamnyń ar-namysyn qorlaýǵa nemese sıpatyn berýge baǵyttalǵandyǵy zerdelendi. Ol úshin arnaıy túsirilgen beınefılm de kórsetildi. Jýrnalıst aty-jónin ózgertip maqala jaza ala ma nemese óziniń derek kózin ashyp kórsetýge mindetti me degen turǵyda da oı órbitildi.
Osy rette Olga Volkova “eger aıyptaýshy mıllıondaǵan somaǵa aryz-talap jazsa, onda ol sol suraǵanynyń belgili bir paıyzyn bıýdjetke tóleýi tıis” degen oı aıtty. Sonda ǵana aryz ıesi sot prosesinde jeńilgen jaǵdaıda quıǵan qarjysynan aırylady. Keleside sotqa bergen kezinde oılana bastaıdy. Al qazirgi jaǵdaıda 600 teńge tólep, mıllıondaǵan teńgelik aryz-talap jazýshylar qatary azaımaı otyr.
Osylaısha eki kúnge sozylǵan taǵylymy mol semınar-trenıng otandyq buqaralyq aqparat quraldary ókilderin taǵy bir satyǵa kóterdi. Jýrnalıstıkanyń qyr-syryn meńgere túsken olarǵa arnaıy sertıfıkat tabys etildi.
Asqar TURAPBAIULY.