Qyzylorda qalasynda Táýelsizdik kúni qarsańynda erekshe qýanysh boldy. Barlyǵy 504 otbasy kópten kútken jańa baspanalaryna qol jetkizdi. Bul qýanyshty oqıǵa turǵyndarǵa úlken úmit syılap, olardyń ómirine jańa betburys ákeldi. Jańa páterlerdiń kiltin tabystaý rásimine Premer-mınıstrdiń orynbasary Tamara Dúısenova men oblys ákimi Nurlybek Nálibaev arnaıy qatysty, dep jazady Egemen.kz.
Memleket qoldaýymen salynǵan bul páterler «Otbasy banktiń» jeńildetilgen zaem arqyly berildi. «Turǵyn úı-kommýnaldyq ınfraqurylymdy damytýdyń 2023 – 2029 jyldarǵa arnalǵan tujyrymdamasy» aıasynda beriletin baspana - búgingi tada turǵyn úı máselesin sheshýdiń eń tıimdi quraldarynyń biri bolyp tabylady. Baǵdarlama aıasynda kóp balaly otbasylarǵa, áleýmettik osal toptarǵa, múgedekterge, jetim balalarǵa, sondaı-aq memlekettik jáne bıýdjettik sala qyzmetkerleri jańa baspanalaryna qonystandy. Aımaq basshysy Nurlybek Nálibaev turǵyndardy jańa baspanalarymen quttyqtap, óńirdiń turǵyn úı qurylysy salasyndaǵy jetistikterine toqtaldy. Memleket basshysy Qasym-Jomart Toqaevtyń tapsyrmasy aıasynda turǵyndardy qoljetimdi baspanamen qamtamasyz etý jumystary júıeli túrde júzege asyrylyp keledi.
«Sońǵy eki jylda aımaqta 4 myńǵa jýyq páter paıdalanýǵa berildi. Bul 17 myń turǵynnyń baspana máselesin sheshti. Al 2023 jyldyń ózinde 1500-den astam otbasy qonys toıyn toılady. Jyl sońyna deıin taǵy 2,5 myń páter paıdalanýǵa beriledi dep josparlanýda. Bul kórsetkishter turǵyn úı qurylysynyń kóleminiń 126 paıyzǵa artqanyn kórsetedi», dedi oblys ákimi.
Sonymen qatar aımaq basshysy jańa páterler turǵyndarǵa tek jaıly turmys ǵana emes, turaqty bolashaqqa senimdilik syılaıtynyn atap ótti. Ol mundaı nátıjelerge qol jetkizý memlekettiń halyqqa qamqorlyǵyn jáne qurylys salasynyń damyp kele jatqanyn dáleldeıdi.
Bul úılerdiń qurylysyna 9,9 mıllıard teńge bólingen. Ár páterdiń aýdany 80-85 sharshy metrdi quraıdy, bul árbir otbasynyń qajettilikterin tolyq qanaǵattandyrýǵa múmkindik beredi.
Jańa baspana ıeleri qýanyshtaryn jasyrmaı, memlekettiń qoldaýyna rızashylyqtaryn bildirdi. Solardyń biri – múmkindigi shekteýli balany tárbıelep otyrǵan Baǵdagúl Jubatqanqyzy. Ol 8 jyldan beri páter kezeginde turǵanyn jáne búgin kópten kútken armanynyń oryndalǵanyn aıtady. Baǵdagúldiń sózinshe, jańa páter tek baspana emes, otbasyna turaqtylyq pen jaılylyq syılady. Olar endi balalaryn qaýipsiz ári jaıly ortada ósire alatynyna qýanyshty.«Mundaı múmkindikti usynǵan memleketimizge, oblys ákimine jáne «Otbasy bankine» úlken alǵysymdy bildiremin. Bul jeńildetilgen ıpoteka arqyly qoljetimdi boldy», dedi ol.
Búgin qonys toıyn toılaıtyn jandar qatarynda Jandos Rysbekov te bar. Qyzylorda qalasynyń órt sóndirý qyzmetinde eńbek etetin ol birneshe jyl kútken óziniń úıine kirip otyr. Ol memlekettik baǵdarlamanyń artyqshylyqtary men tıimdiliginiń arqasynda osyndaı páterge qol jetkizdim, deıdi.
«Biz memlekettik baǵdarlamanyń arqasynda "Otbasy bank» arqyly páter aldyq. Osyndaı múmkindikterdi jasaǵan basshylyqqa jáne qurylysshylarǵa raqmet. Jańa páter ıelerin shyn júrekten quttyqtaımyn», dedi ol.
Turǵyn úılerdi qoljetimdi etýde «Otbasy bank» erekshe ról atqarýda. Banktiń Qalalyq fılıalynyń bıznesti damytý bóliminiń basshysy Shyńǵys Quttyqov baǵdarlamanyń tıimdi sharttaryn túsindirip berdi:«Bul baǵdarlama turǵyn úıge muqtaj azamattarǵa arnalǵan. Áleýmettik osal toptar men bıýdjettik qyzmetkerler úıdiń bastapqy jarnasyna 10 paıyz tólep, jeńildetilgen paıyzben nesıe ala alady. Áleýmettik osal toptaǵy azamattar úshin mólsherleme 2 paıyz (JTSM 2,0% bastap 2,1% deıin), al memlekettik qyzmetkerler úshin 5 paıyzǵa deıin (JTSM 5,2% bastap 5,8% deıin) jeńildik qarastyrylǵan. Bul tek bizdiń bank salymshylaryna arnalǵan baǵdarlama», dedi ol.
Sonymen qatar kezekte turǵan salymshylar «Baspana Market» portaly arqyly ótinish bildire alady. Bul portal turǵyndarǵa ózderiniń múmkindikterin tıimdi paıdalanýǵa jáne jyldam aqparat alýǵa jol ashady.
Syrdarııanyń sol jaǵalaýynda ornalasqan bul turǵyn úıler – zamanaýı ınfraqurylymmen jabdyqtalǵan. Barlyǵy 7 qabatty 6 úıden turatyn keshende 504 páter bar. Ár páterdiń aýdany 80-85 sharshy metr. Jobada jedelsatylar, balalar oıyn alańdary jáne avtokólik turaqtary qarastyrylǵan.
Árbir otbasynyń qajettiligin eskerip salynǵan bul úılerdiń berilýi – óńirdegi áleýmettik jaǵdaıdy jaqsartý baǵytyndaǵy naqty qadam. Jańa keshen turǵyndary endi qaýipsiz ári jaıly ómir súretin ortada turatyn bolady. Úılerdiń ishki árleýi men paıdalanylǵan materıaldardyń sapasy joǵary deńgeıde. Ár páterde zamanaýı santehnıka, jylytý júıesi jáne energııa únemdeıtin terezeler ornatylǵan. Sonymen qatar, árbir aýlada balalarǵa arnalǵan oıyn alańdary, demalys oryndary jáne kólik turaqtary bar.
Jańa qonysqa ıe bolǵan turǵyndar úshin bul úıler tek jaıly baspana ǵana emes, sonymen qatar bolashaqqa degen senimniń kepiline aınaldy. Osylaısha, Syr óńiri qoljetimdi turǵyn úı salasyndaǵy úlgili óńirlerdiń biri retinde tanylyp jatyr.