Táýelsizdik kúnine oraı Batys Qazaqstan oblysynyń Bórli aýdanynda birneshe áleýmettik nysan paıdalanýǵa berildi.
Býmakól aýyldyq okrýgine qarasty Oblavka aýyly shaǵyn bolǵanymen, shekaranyń irgesinde turǵan strategııalyq eldi meken. Memlekettik shekara dál aýyl janynan aǵatyn Jaıyq ózeni arqyly ótedi. Osydan 10 jyl buryn respýblıka qazynasynan qomaqty qarjy bólinip, ózenniń jyl saıyn sý qulatyp kele jatqan jaǵalaýy bekitilgen edi. Aýylda 228 eresek turǵyn bar. Táýelsizdik kúni qarsańynda osy aýylda sý jańa medısınalyq pýnkt paıdalanýǵa berildi.
Jańa nysan qurylysyna 160 mln teńge jumsalǵan. «Aýylda densaýlyq saqtaýdy jańǵyrtý» baǵdarlamasy aıasynda júzege asqan bul jobaǵa tapsyrys bergen – Batys Qazaqstan oblystyq densaýlyq saqtaý basqarmasy eken. Qurylys-montaj jumysy bıylǵy qyrkúıek aıynda ǵana bastalsa da, merdiger «Ýralskstroıınvest» kompanııasy medısınalyq pýktti az ýaqyt ishinde sapaly etip salyp shyqqan.
«Bizdiń buǵan deıin paıdalanyp kelgen ǵımaratymyz 1950 jyldary salynǵan kóne úı edi. Qazir kirip otyrǵan jańa ǵımaratymyzdyń aýmaǵy 155 sharshymetr. Munda dárigerge deıingi qaraý, prosedýralyq, fızıoterapııalyq kabınetter, medbıkeniń qabyldaý bólmesi jáne tehnıkalyq burysh bar. Qajetti qural-jabdyq daıyn. Shtatta medbıke, tehnıkalyq qyzmetker, kúzetshi jáne eki qazandyq operatory jumys isteımiz. Aýyl turǵyndarynyń densaýlyǵy udaıy nazarymyzda. Dál qazir aýylda bir jasqa deıingi 2 bala, 14 jasqa deıingi 48 bala bar. Esepte turǵan júkti áıel joq. Biz bul jerde naýqastardy qabyldap, tekserip, fýnksıonaldyq mindetterimizge kiretin prosedýralardy júrgizemiz», deıdi medbıke Gúlnár Temirǵalıeva.
40 jylǵa jýyq eńbek ótiliniń 35 jylyn osy aýylda medbıke bolyp atqarǵan Gúlnár Temirǵalıqyzy – óz isiniń jetik mamany.
Aýyldaǵy jańa nysannyń ashylý saltanatynda Bórli aýdany ákiminiń orynbasary Muqtar Nurmaqov qatysyp, turǵyndardy Táýelsizdik kúnimen quttyqtap, jańa medısınalyq pýnkttiń el ıgiligine qyzmet etýine tilek bildirdi. Aýyl turǵyndary atynan sóz alǵan Meıram Tataev zamanaýı apparattarmen jabdyqtalǵan jańa ǵımarat úshin memleket qamqorlyǵyna alǵys aıtty.
Bul kúni Bórli aýdanyndaǵy Aqsý aýyly turǵyndary da dál osyndaı sý jańa medısınalyq beketke ıe bolyp, qýanyshqa bólendi. Aqsý aýyldyq okrýgine qarasty Aqsý jáne Jańaqonys aýyldarynda 510 adam turyp jatyr. Endi olar bas aýyryp, baltyr syzdasa aýdanǵa sabylmaı, jeńil-jelpi syrqat bolsa óz aýylynda sapaly em alatyn boldy. Aýylǵa bıyl ǵana joldamamen kelgen medbıke Gúlnár Ǵusmanovaǵa osydan buryn qyzmettik páter berilgen edi. Jas maman úshin alańsyz qyzmet etetin barlyq jaǵdaı jasalǵan.
«Bizdiń Bórli aýdanynda «Aýylda densaýlyq saqtaýdy jańǵyrtý» memlekettik baǵdarlamasy óte jaqsy júzege asyp keledi. Byltyr ǵana Aqsaı qalasynyń irgesindegi Araltal shaǵynaýdanynda ambýlatorııa paıdalanýǵa berildi. Bıyl kúzden beri Qaraǵandy aýylynda feldsherlik-akýsherlik beket, Jańaqonys, Oblavka, Aqsý aýyldarynda ambýlatorııa iske qosyldy. Bul jumys bolashaqta da jalǵasady. Buǵan qosa aýylda turatyn medısına qyzmetkerleri úshin «Sobol» markaly 6 avtokólik berildi», deıdi Bórli aýdandyq aýrýhanasynyń dırektory Altynaı Baımuratova.
Táýelsizdik merekesi qarsańynda Bórli aýdanynda bolǵan oń jańalyqtyń qataryna Qarashyǵanaq jáne Ýspen aýyldaryndaǵy turǵyn úılerdiń ortalyq sý qubyry júıesine qosylyp, sapaly aýyz sýmen qamtamasyz etilgenin aıta keteıik. «Aýyl el besigi» baǵdarlamasy aıasynda júzege asqan sý jelisiniń jalpy uzyndyǵy 16,5 shaqyrym. Aýylda jańa munara men sý qoımasy ornatylǵan.
Batys Qazaqstan oblysy