Bul oqıǵa eldiń jadynan áli shyqqan joq. Eleń-alańda kisi joǵyn paıdalanyp betperde kıip dúkenge kirgen qaraqshy esikti ishten ilip, satýshy Aıshagúl Ibashevaǵa qarý kezegen.
Kóbirek olja qamtyǵysy kelgen ol ózine qarsy turǵan kelinshekti súıreı-múıreı kelesi bólmege ótedi. Aýyldyń qara sharýaǵa pisken qaıratty áıeli tapansha ustaǵan qoldan qos qoldap ustap, oraıy kelgende oqpanyn qylmyskerge qaratyp shúrippeni basyp qalady. Qanǵa bókken qylmysker de qarap qalmaı, áıeldi bir qoıyp jalp etkizedi de atyp salady.
Ári qaraı jurt qulaqtanyp, ońbasyn bilgen ol dereý syrtqa atylyp, mashınasyna minip úlgeredi.
Qylmyskermen arpalysyp qanyna qaraıǵan Aıshagúl jaraqatyna qaramaı onyń kóligin baıqastaıdy.
Oq ıyǵynan tıgen eken. Jany kózine kórinip tursa da Aıshagúl Otyrar aýdandyq ishki ister bólimine telefon shalyp, bolǵan jaıdy málimdeıdi. Jedel jetken tártip saqshylaryna qylmyskerdiń túr-túsi, dene bitimi, mingen mashınasyna deıin sıpattap beredi.
Qylmysker arada bir aı ótkennen keıin ustalǵan. Alystan kelgen jaý emes, sol Otyrar aýdanynyń turǵyny eken. Buryn Taraz qalasynda adam óltirip sotty bolǵan. Merzimin ótegennen keıingi tirligi osy. Túrme, bas bostandyǵy sabaq bolmaǵan sabazdyń ústinen QR QK-niń 179-babyna sáıkes qylmystyq is qozǵalyp, tergeý amaldary júrýde. Al aýyr qylmysty ashýǵa járdemdesken Aıshagúl Ibasheva jaqynda IIM-niń Qurmet gramotasymen marapattaldy. Ishki ister mınıstriniń orynbasary, polısııa generaly Rashıd Jaqypovtyń qolynan gramota aldy.
Aıshagúldi jerlesteri batyrǵa teńeıdi. Qysyltaıań shaqta qylmyskerdiń yrqynda ketpeı, erlerge laıyq erlik kórsetken kelinshek qaýipti oılap úlgermegenin aıtady. Batyrlyq qanynda bar-aý, sirá!
Baqtııar TAIJAN,
«Egemen Qazaqstan».
ShYMKENT.