Áleýmettik jelide kópir synyp, júk kóliginiń ózenge qulaǵany beınelengen vıdeo tarap jatyr. Jeli qoldanýshylary júktegen vıdeodaǵy oqıǵa SQO-daǵy Ǵ.Músirepov aýylynda bolǵany anyqtaldy, dep jazady Egemen.kz.
Oqys oqıǵa Ǵ.Músirepov aýdanynyń Birlik aýylynda bolǵan. Kópir turǵyndardy kelesi aýyl Nejınkamen baılanystyryp otyrǵan jalǵyz kópir bolǵan.
Aýdan ákimdigi bıdaı artqan aýyr júk kóligin ózennen shyǵarý jumystary júrgizilip jatqanyn málim etti.
«Joldy qysqartý maqsatynda júk tıelgen «Shacman» osy ótkelmen ótpek bolǵan. Saldarynan ótkel synyp ketip, júk kóligi aýdaryldy. Zardap shekkender joq. Qazirgi ýaqytta júk avtokóligin súırep shyǵarý jumysy júrgizilip jatyr. Sodan keıin ótkeldi qalpyna keltirý jumystary bastalady», delingen ákimdik habarlamasynda.
Ákimdik kópirdi jóndeý qurylysyna jobalyq-smetalyq qujattama ázirlengenin, qazirgi ýaqytta ol memlekettik saraptamadan ótkizilip jatqanyn da atap ótken.
Al aýdandyq polısııa «Shacman» avtokóliginiń 56 jastaǵy júrgizýshisi rýlge ıe bola almaı kólik aýdarylyp, Esil ózenine qulaǵanyn anyqtaǵan.
Oqıǵanyń ózge de mán-jaıyn anyqtaý úshin polısııa isti tergeýdi bastaǵan.