О́ńirdiń qaı qıyrynda bolsyn, tarıhy tereńnen tamyr tartatyn jádigerler az emes. Jurt Túrkistandaǵy taıqazandy myńjyldyqtardyń murasy retinde baǵalasa, Turar Rysqulov aýdanynyń ortalyǵy Qulan aýylynyń turǵyndary aýdandyq tarıhı-ólketaný mýzeıinde saqtalǵan qola qazandy maqtan tutady.
«Mýzeıimizde turǵan qola qazannyń bıiktigi 58 santımetr bolsa, dıametri 60 santımetrdi quraıdy. Qazannyń tórt tutqasy bar. Eki tutqa jádigerdi kóterip qoıýǵa arnalǵan bolsa, qalǵan ekeýi qazandy aspaly shynjyr arqyly joǵary kóterip, astyna ot jaǵý úshin paıdalanylady. Derekke júginsek, yqylym zamannan jetken jádiger qoladan jasalǵan eken», deıdi aýdandyq mýzeıdiń basshysy Eldar О́tembaev.
Mýzeı dırektory keltirgen derekke júginsek, pishini jarty sharǵa uqsaıtyn jádigerdiń kólemi shamamen 60 lıtr sýǵa shaqtalǵan. Qalyńdyǵy 0,8 santımetrdi quraıdy. Al tórt doǵaly tutqasy qazandy ustaýǵa yńǵaılastyrylyp jasalǵan.
«Qazannyń astyńǵy jaǵynda birikken tuǵyry bar. Kúlgin tústi jádigerdiń joǵary jaǵyndaǵy erneýiniń azdaǵan bóligi synǵan. Yqylym zamanda ǵumyr keshken adamdardyń temirdi qaı deńgeıde, qandaı maqsatta paıdalanǵanyn osy qazanǵa qarap-aq ańǵarýǵa bolady. Jalpy alǵanda qola qazan qundy arheologııalyq artefaktiler sanatyna jatady. Biz úshin sonysymen de qundy», deıdi mýzeı dırektory.
Jalpy, aýdan ortalyǵyndaǵy mýzeıde óńirdiń tarıhynan syr shertetin kóne jádigerler az emes. Áıtse de mýzeı qyzmetkerleriniń aıtýynsha, ǵımaratqa bas suqqan jergilikti turǵyndar kóbinese qola qazannyń tarıhyn suraıdy eken.
Jambyl oblysy,
Turar Rysqulov aýdany,
Qulan aýyly