QR Eńbek jáne halyqty áleýmettik qorǵaý mınıstrligi «Qazaqmys korporasııasy» JShS «Jezqazǵantústimet» óndiristik birlestiginiń ereýilge shyqqan jumyskerleri eńbek zańnamasynyń normalaryn buzǵanyn málimdeıdi jáne kompanııa jumyskerlerin óz jumystaryn qaıta bastaýǵa shaqyrady, olardyń jumys berýshige qoıatyn talaptaryn belgilengen tártippen talqylaýdy usynady, dep habarlaıdy Egemen.kz mınıstrliktiń baspasóz qyzmetine silteme jasap.
«Osy jyldyń 17-18 jeltoqsanynda «Jezqazǵantústimet» О́B birneshe shahtasynyń jumyskerleri jalaqyny kóterý talabymen jumysty toqtatty. Jumyskerlerdiń bul áreketteri eńbek zańnamasynda kózdelgendeı talaptardy usyný tártibin jáne olardy jumys berýshiniń qaraý retin buza otyryp júrgizildi», delingen mınıstrlik habarlamasynda.
QR Eńbek kodeksine sáıkes qoldanystaǵy tártip: osy talaptardy jumys berýshige resmı joldaýdy, olardy jumys berýshimen qaralýyn, al ony sheshý múmkin bolmaǵan jaǵdaıda tatýlastyrý komıssııasynda qarastyrýdy kózdeıdi.
Qalyptasqan jaǵdaıdy retteý maqsatynda Eńbekmıni taraptardy tatýlastyrý komıssııasy sheńberinde jáne tek quqyq aıasynda tatýlastyrý rásimderin júrgizýge jáne jumysqa qaıta kirisýge shaqyrdy.
2024 jylǵy 18 jeltoqsanda «Qazaqmys korporasııasy» JShS basqarma tóraǵasy Nurahmet Nýrıev Jezqazǵan óndiristik alańyndaǵy kenishterdiń brıgadırlerimen kezdesti.
Jıynǵa sonymen qatar Jezqazǵan qalasynyń ákimi Qaırat Shaıjanov, Sátbaev qalasynyń ákimi Murat Bóribaev qatysty.
Kezdesýde jumyskerlerdiń talaby talqylandy. Jıyn qorytyndysynda «13-shi jalaqyǵa» 30 paıyz mólsherinde ústemeaqy qosý týraly talapty qanaǵattandyrý týraly sheshim qabyldandy.
«Jalaqyǵa keletin bolsaq, jumys berýshi 2025 jyldyń 1 qańtarynan bastap jalaqyny kóterýdiń eki nusqasyn usyndy:
Birinshi nusqasy jalaqy mólsherin qosymsha 8,5%-ǵa ulǵaıtý, óndiristik jospardy oryndaǵany úshin qosymsha 50 AEK mólsherinde tórt toqsandyq syılyqaqy (2025 jyly – toqsan saıyn 196 myń teńge) tóleý. Ekinshi nusqasy jalaqyny 15,6%-ǵa ındeksteý.
Kelissóz barysynda N.Nýrıev jalaqynyń kúrt ári negizsiz ulǵaıýy túptiń túbinde kompanııanyń birqatar kenishteriniń básekege qabilettiligin joıyp, konservasııalanýyna ákeletinin, saldarynan jumys oryndarynyń jabylýyna ákelip soqtyratynyn atap ótti. Sondaı-aq usynystardy túsindirý úshin jumys oryndarynda, onyń ishinde shahtalarda jumysshylarmen tikeleı kezdesý uıymdastyryldy. 2024 jyl 19 jeltoqsan saǵat 09:00-degi jaǵdaı boıynsha, kelissóz jalǵasýda. Kompanııa barlyq jumyskerlerdi ystyq tamaqpen qamtamasyz etýde», delingen Kazakhmys-tyń resmı saıtynda jarııalanǵan habarlamada.
«Qazaqmys korporasııasy» JShS qalyptasqan jaǵdaıdy tezirek sheshý úshin oń qadamdardy júzege asyrýdy jalǵastyrýda.