Qaraǵandy qalasynda mánerlep syrǵanaýdan el chempıonaty aıaqtaldy. Jarysta elimizdiń birqatar óńirinen kelgen eń úzdik sportshylar baq synady.
Áıelder arasyndaǵy saıysta Sofıa Samodelkınaǵa teń keler eshkim bolmady. 17 jastaǵy chempıon Máskeýde týyp-ósip, Qazaqstan azamattyǵyn bıyl ǵana alǵanymen, bizge bóten emes eken. Anasy Marına Krylova Almaty oblysynyń Uzynaǵash aýylynda týǵan. Keıin jıyrma jyldaı Temirtaý qalasynda turǵan. Mánerlep syrǵanaýdy baldyrǵan kezinen serik etken Sofıa birden dara darynymen tanyldy, qatarlastarynyń aldy boldy. Ýaqyt oza kele birqatar halyqaralyq jarysta jeńis tuǵyryna kóterildi. Elimizge kelgen boıda el birinshiliginde altynnan alqa taǵyp, ulttyq komandanyń sapyna qabyldandy. Bıyl Estonııada ótken Tallın kýbogi men Astanada uıymdastyrylǵan Denıs Tenniń memorıalynda kúmis medalge ıe boldy. Endi mine, Qaraǵandydaǵy básekede bas júldeni oljalap otyr. Jarysta ekinshi, úshinshi oryndardy astanalyq Zere Sarabalına, almatylyq Sofııa Farafonova ıelendi.
Erler arasyndaǵy saıysqa Mıhaıl Shaıdorov qatyspady. Elimizdiń eń úzdik mánerlep syrǵanaýshysy bıylǵy maýsymda Denıs Tenniń memorıalynda altyn alsa, Qytaıdaǵy dodada kúmispen kúpteldi. Fransııadaǵy týrnırde tórtinshi oryndy ıelense, jýyrda ǵana Grenoblde ótken fınaldyq Gran-prıde besinshi satyǵa taban tiredi. Sol sebepti de ulttyq qurama bapkerleri Shaıdorovqa demalys berýdi jón kórdi. Qaraǵandy muz aıdynynda astanalyq Dıas Jırenbaev aldyna jan salmady. Ekinshi, úshinshi oryndardy almatylyq Nıkıta Krıvosheev pen qyzylordalyq Artýr Smaǵulov enshiledi.