Balalarǵa arnalǵan qazaq tilindegi týyndylar qatary taǵy bir jobamen tolyqty, dep habarlaıdy Egemen.kz.
«Kazunite» kompanııasynyń «Tulǵa ınjenerııasy» jobasy sheńberinde jaryqqa shyqqan jýrnal 6-12 jas aralyǵyndaǵy balalarǵa arnalǵan eken.
Balalardyń oılaý júıesin damytyp, ózin jáne ómirdi túsinýge, aıqyn maqsattar qoıa bilýge jáne soǵan umtylýǵa baýlıtyn motıvasııalyq áńgimeler men psıhologııalyq jattyǵýlar qamtylǵan eńbek «Meniń armandarym» dep atalady. Jýrnaldy qolyna alǵan bala óziniń arman-maqsatyn jazyp, berilgen suraqtarǵa jaýap bere otyryp, tapsyrmalardy boıaıdy.
Avtorlary otandyq jýrnalıstıka salasynda ózindik orny bar, birneshe tanymdyq kitaptardyń avtory, búginde AQSh-ta bilimin jalǵastyryp júrgen tanymal jýrnalıst Názıra Baıyrbek pen «Astana aqshamy» gazetiniń sholýshysy Gúlmıra Aımaǵanbet.
«Jýrnaldy daıyndaǵan eki avtor, birimiz – Qazaqstanda, birimiz – Amerıkada júrip, jumys istep, oqyp, ózimizdi damytyp júrip, qazaqtyń botaqandary da qazirgiden de damyǵan, jaqsy ómirge laıyq bolsa dep osy jýrnaldy aq tilekpen daıyndadyq. Jýrnalıstıkada 20 jyldaı qyzmet etip, álem elderiniń birazyn kórip, birimiz 5, birimiz 6 bala ósirip, «qalaı balalarymyzdy myqty adam etip ósirsek eken?» degen suraqpen 20 jyldaı izdengen anamyz. Jýrnaldy damyǵan elderdegi joǵary deńgeıli qoǵamǵa laıyq bala tárbıeleý tájirıbelerin kórip otyryp, jasadyq. Oǵan, álbette óz balalarymyzǵa qoldanǵan eksperımentter úles qosty», deıdi avtorlar.