Qyrǵyzstan prezıdenti Sadyr Japarov Bishkekte ótip jatqan úshinshi Halyqtyq quryltaıda ımamdarǵa jalaqy tóleý máselesine qatysty pikir bildirdi, dep jazady Egemen.kz kabar.kg-ge silteme jasap.
Qyrǵyz prezıdentiniń aıtýynsha, 2025 jyldyń naýryz aıynan bastap ımamdarǵa bastapqyda 8 myń som, jyl sońyna deıin 20 myń som jalaqy tóleý josparlanyp otyr.
«Bul baǵytqa qarjy bıýdjetten bólinbeıdi. Qyrǵyzstan musylmandary dinı basqarmasy buǵan deıin mán bermegen derekkózder bar. Bul qarjyny meshitterdiń qyzmetine, dálirek aıtsaq ımamdarǵa baǵyttaǵymyz keledi. Biz zaıyrly memleket retinde dinge aralaspaımyz, al din ókilderi saıasatqa aralaspaıdy. Osyǵan baılanysty biz respýblıkalyq bıýdjetten qarjy bóle almaımyz. Sonymen birge, memleket óz múmkindigine qaraı Qyrǵyzstan musylmandary dinı basqarmasyna qoldaý kórsetip jatyr», dedi Sadyr Japarov.
Kórshi el basshysy 2025 jyly Qyrǵyzstan meshitterinde elektrondy sadaqa jáshikteri ornatylatynyn da atap ótti.
«Kelesi jyly árbir meshitke elektrondy jáshikter ornatylady. Halyq sadaqany QR kodyn paıdalanyp telefon arqyly aýdara alady. Sondyqtan qasıetti úılerde burynǵydaı temir jáne aǵash jáshikter bolmaıdy. Qyrǵyzstan musylmandary dinı basqarmasy elektrondy sadaqa jáshikterine jınalǵan qarjyny qaıda jiberý kerek ekenin ózderi sheshedi», dedi Qyrǵyzstan prezıdenti.