Qostanaıǵa Premer-Mınıstrdiń orynbasary Berdibek Saparbaev bastaǵan quramynda birqatar mınıstrlikter men ulttyq kompanııalar ókilderi bar delegasııa keldi. Bul sapar jahandyq qarjy daǵdarysynyń elge zardaby bolmaýy úshin onyń aldyn alý maqsatyn kózdeıdi. Daǵdarys jalpy elimizdegi áleýmettik-ekonomıkalyq jaǵdaıdy qıyndatpaǵanymen, kórshi Reseı rýbliniń qunsyzdanýy qostanaılyq kásiporyndar jumysyna birden áser etti. Mysaly, Úkimet delegasııasy men jergilikti kásiporyn basshylarynyń memorandýmǵa qol qoıý rásimi atshaptyrym sehynda ótken «AgromashHoldıng» aksıonerlik qoǵamynyń jumysyna daǵdarys qazirdiń ózinde salqynyn tıgizip otyr. Qazaqstanda mashına jasaý salasynyń damýyna zor úles qosyp otyrǵan «AgromashHoldıng» zaýyty sheteldik jeńil avtomobılder men aýylsharýashylyq tehnıkalarynyń túr-túrin óndiredi. Keńeste osy kompanııanyń basqarma tóraǵasy Alekseı Sıdorenko aıtqandaı, «AgromashHoldıng» aksıonerlik qoǵamy ótken jyly 8,5 myń mashınany sapqa qoıǵan. Bul 2013 jylmen salystyrǵanda 20 paıyzǵa artyq bolatyn. Kásiporyn bıyl da 20 myń mashınany shyǵarýdy josparlaǵan edi. Alaıda, «úıdegi oıdy bazardaǵy naryq buzyp», daǵdarys talma jerden tıip otyr.
Reseı rýbli qunsyzdanǵan az ǵana ýaqyttan beri qazaqstandyqtar kórshi elden 40 myńnan asa mashına ákeldi. Árıne, bul otandyq mashına jasaý kásipornynyń jumysyna birden keri áserin tıgizdi.
– Álemniń kóp elin sharpyp otyrǵan daǵdarysqa tótep berý úshin Elbasy Nursultan Nazarbaev birqatar talap qoıyp, tapsyrmalar berip otyr. Sonyń eń bastysy halyqqa jumys berý, jumyssyzdar sanyn kóbeıtpeý, áleýmettik jaǵdaıdyń tómendeýine jol bermeý bolyp tabylady. Elimizde 8 memlekettik baǵdarlama jumys istep jatyr, solardyń arqasynda 400 myńǵa jýyq jumys orny ashylýy tıis. Munyń barlyǵy ishki múmkindikterimizdi paıdalanǵanda júzege asady, – dedi Berdibek Saparbaev.
Damý bolmasa daǵdarys meńdeı beredi. Bul oraıda Qostanaı oblysynda kóńilge qonymdy jumystar bar. О́tken jyly shaǵyn jáne orta bıznes bıýdjetke 22,8 mıllıard teńge qarjy quıdy. Sońǵy jyldary óndiristiń qadamy qaryshty boldy. Osyndaı mysaldar jetkilikti. Alaıda, daǵdarys kezinde óndirgen ónimiń ótpese, ol da kásiporyndar qadamyn tusaıdy. Sondyqtan B.Saparbaev kórshi oblystar arasyndaǵy alys-beristi keńeıtý kerektigin aıtty.
B.Saparbaev eńbekaqy qaryzyn kópke uzatpaýdy oblys ákimi Nuraly Sádýaqasovqa naqty tapsyrdy. Oblysta ol qazir 55 mıllıon teńgeni qurap otyr. Keńes sońynda Qostanaı oblysynyń ákimdigi, kásipodaqtardyń oblystyq keńesi jáne kásiporyndar basshylary arasynda jumysshylardyń eńbek quqyǵy men kepildikterin qamtamasyz etý jóninde ózara túsinistik pen yntymaqtastyq týraly memorandýmǵa qol qoıyldy. Oblys ákimdigimen memorandýmǵa qol qoıǵandar arasynda «Qazaqtelekom», «SSKBО́B», «Orıon Mınerals», «Baıan Sulý», «Agromashholdıng», «Qostanaı mıneraldary», «Araı Holdıng», «Alıýmınstroı», «Qostanaı un kombınaty» jáne óńirdegi iri kásiporyndar bar.
Sondaı-aq, oblystyń jáne respýblıkanyń júıe quraýshy kásiporyndarynyń, ulttyq kompanııalarynyń arasynda qazaqstandyq qamtýdy qamtamasyz etý jáne otandyq taýar óndirýshilerdi qoldaý jóninde yntymaqtastyq týraly memorandýmdarǵa da qol qoıyldy. Bul memorandýmdar somasy 1 847 mıllıon teńgeni quraıdy.
Názıra JÁRIMBETOVA,
«Egemen Qazaqstan».
QOSTANAI.